SHILLONG 22, Jymmang: Mynta ka step sngi Nyngkong, ka tnat Forest ka la kyndang naphang ia ki dukan kiba don ha shi lynter ka surok naduh Pomlum shaduh Umdiengpun, Upper Shillong.
Ha kane ka jingleit kyndang, ka Forest ka la rat da ki puhshilum ia ki dukan kiba don kumba 40 tylli eiei ha kane ka jaka. La synran lang ia ki Forest Guard da ka tnat pulit jong ka East Khasi Hills District. Ka jingkyndang ka la sdang ia ki dukan naduh ka por 5 baje mynstep.
la kane ka jaka la kam trai da ki briew na ka kur Rapsang bad ha kane ka jijngleit kyndang ka Forest ka la don ruh ka jingkhanglad na ki katto katne ngut ki briew kiba dei ki nongtrei jong ki Rapsang hynrei 5 ngut na ki, ki la shah kem noh ha ki pulit.
Shuwa ban kyndang ia kine ki dukan, u Divisional Forest Officer jong ka tnat Forest East Khasi Hills bad Ri Bhoi District u la ai jingtip sha baroh kine ki dukan ba ki dei ban mih noh na kane ka jaka namar ba ki dei kiba la pynieng beain ha ka jaka jong ka Forest bad ka la maham lypa ruh ba lada kim mih kan leh ia kaba donkam katkum ka Meghalaya Forest Regulation (Application and Amendment Act 1973). Dei na ka jingbym mih jong ki, ba ka tnad Forest kam banse ban ialam da ka Puhshilum ban shu pynkhuid syndon plain.