SHILLONG 21, Jymmang: Ka kynjatbol ha jylla bad kumjuh ha Shillong kala pjah ha ki katto katne snem mynta hadien ba ka Shillong Lajong FC kam ioh ialehkai shuh ha ka lympung I-League ka All India Football Federation (AIFF).
Hynrei mynta kane ka jingieid kynjatbol ki paidbah kan khie im biang hadien ba ka Shillong Lajong kala pynthikna ban ioh rung biang ha ka lympung bad, kane kala urlong hadien ba ka Lajong kala jop ha ka jingiakhun ba khadduh mynta ka sngi pyrshah ia ka Bangaluru FC da 2-1 kol ha madan SSA, Polo, Shillong jong ka Second Division League. Ha ka jingialehkai, la sakhi kumba 5000 ngut ki paidbah riew ieid kynjatbol ka jylla kiba rah da ka nakra, ki ksing ban tem pynshongshit ban ai jingkyrshan ia ka kynhun lajong hapoh ka jingialam u coach bah Bobby Lyngdoh Nongbet.
Ha ka jingialehkai, u Everbrightson Mylliempdah u la thep ia ka Lajong ha ka 43 minit ka kyllastep shwa ba u nongialehkai ka Bengaluru u Kongbrailatpam Manjit Sharma u la pyniakhaid ha ka 51 minit ka kyllamiet. Ka nam jop ia ka Lajongh ka wan na ka kol jong u Figo Syndai ha ka 82 minit ban pynthikna ia ka Lajong ban bat ha ka kyrdan ba nyngkong jong ka mieh iakhur point.
Ka kynhun ka Lajong: Rajat Paul Lyngdoh (GK), Henry Ford Nongneng, Saveme Tariang, Iohborlang Lyngdoh Lyngkhoi (Atlanson Kharmaw 79′), Everbrightson Mylliempdah (Amon Lepcha 64′), Hardy Cliff Nongbri, Ronaldkydon Lyngdoh Nonglait, Figo Syndai (Babysunday Marngar 86′), Sangti Janai Shianglong, Wadajied Kynsai Ryngkhlem (Pynche Tyngkan 86′), Hamedamanbha Wahlang.
Yn khih biang ka jingieid kynjatbol ka jylla ba ioh rung I-League ka Lajong
