SHILLONG 21, Jymmang: Ka myntri ka tnad ka koit ka khiah ka jylla ka Kong Ampareen Lyngdoh ha ka sngi Saitjain ka la plie ia ka Lawbah Primary Health Centre (PHC) ha ka jingdon lang u MLA ka Mawsynram u bah Ollan Singh Suin, ka Deputy Commissioner ka kong Rosette M Kurbah, u MLA barim bah HM Shangpliang ha ka jingialang ha phyllaw kae PHC ha Lawbah, East Khasi Hills District.
Haba kren ha kane ka jingialang ka kong Ampareen ka la ong ba ka sorkar ka la kut jingmut ban pynthikna ban wanrah ia ka jingsumar sha jan jong ki paidbah ha ka rukom kaba bit ba biang bad ka jingplie ia kane ka PHC kan dei ka nongmuna na bynta ka jingthmu ka sorkar halor kane ban pynpoi ia ki lad jingsumar ba paka sha nongkyndong.
Ka la ong ba kane ka PHC kan ai ka jingshakri ia ki paidbah ka thain Lawbah bad kyntu ia ki paidbah ban iatreilang bad ka sorkar bad kumjuh ban sumar ia ka.
Ka la pyrto ruh ia ka Special Purpose Vehicle Society (SPVS) kaba la leh ka kompeni Lafarge Umiam Mining Private Ltd. (LUMPL) ban pynioh ia ki kor ki bor ha kane ka PHC. Ia kane ka PHC ha Lawbah la tei ha ka jinglut kaba T. 4.19 klur.