WAHKHEN 21, Jymmang: Ha ka sien ba nyngkong, ka Chairperson ka Sangeet Natak Akademi, New Delhi ka Sandhya Purecha mynta ka sngi ka la wan jngoh ia ka Sieng Riti Institute, ha shnong Wahkhen. Ka Sieng Riti ka dei ka shlem ai jinghikai ia ka put ka tem, ka riam ka beit, bad ki jinghikai tynrai jong u mynbarim.
Ha kane ka sngi, ka Sandhya Purecha kala iakynduh ia ki khynnah ba shah hikai ha kane ka shlem, ki nonghikai bad kala ioh ruh ban sakhi ia ki sur jingtem bad jingtem na ki khynnah ka Sieng Riti.
Haba kren ha kane ka sngi, ka Purecha ka la iaroh ia ka Sieng Riti kaba la lah ban pynneh, ban kyntiew ia ka kolshor bad ka jinglong tynrai jong ka jaitbynriew Khasi.
Da kaba shoh bad iapngiah ia ka jingtbit ki khynnah ban pyni ia ka skit tem, ka la ong, “Phi ki khynnah kynthei bad shynrang phi la leh ia ka bynta kaba khraw tam ban kyntiew ia ka lariti jong phi. Nga sngew sarong shisha iaphi. Nga dem khohsiew hakhmat jong phi”, la ong ka Purecha.
Ka la ong ba ki khynnah kane ka shlem ki dei ka lawei jong ka ri India ha kaba kila shim ia kane ka sienjam ban kyntiew ia ka lariti ka jaitbynriew Khasi ha kane ka juk shai ba mynta.
“Kum ka chairperson ka Sangeet Natak Akademi, nga kular iaphi ba ngin iarap iaphi katba lah” ka la bynrap.