SHILLONG, Jymmang: U Myntri Rangbahduh ka ri u Narendra Modi u la iakynduh ia u President ka ri Ukraine u Volodymyr Zelensky ha ka bynta jong ka jingialang ka G7 ha nongbah Hiroshima, Japan ha kane ka sngi Saitjain. Kane ka dei ka sien ba nyngkong ba u Modi un iakynduh ia u President ka Ukraine markhmat hadien ba ka Russia ka la hiar thma ia ka Ukraine ha u Rymphang mynshem snem.
“Ka thma ha Ukraine ka dei ka mat kaba khraw jong baroh ka pyrthei. Ka la ktah ia ka pyrthei ha kiba bun ki bynta hynrei ngam shim ba ka dei ka kam sain pyrthei ne ka kam jong ka ioh ka kot. Ha nga, ka dei ka mat jong u khun bynriew bad ka dor jong u khun bynriew. Phi tip ka jingjynjar jong ka thma kham bha ia ngi. Haba ki samla jong ngi ki la wan phai na Ukraine mynshem nga sngewthuh ia ka jingjynjar haduh katno. Nga pynthikna ia phi ba ka India bad ma nga shimet, ngin do ia kaei kabab ha tam ban pynbeit ia kane ka jingeh”, la ong u Modi ha ka jingiakynduh bad u President ka Ukraine ha Hiroshima.
U Myntri Rangbahduh ka ri u la leit sha Japan ban iashim bynta ha ka jingialang jong ka G7 nalor u national security advisor u Ajit Doval bad kiwei.