SHILLONG 20, Jymmang (PIB): Ia ka lut T 2000 la pyllait paidbah ha u Naiwieng 2016 hapoh ka Section 24(1) jong ka RBI Act, 1934, ban pynbiang ia ka jingdonkam pisa ha ka ioh ka kot ha ka rukom kaba sted hadien ba la weng ia ki lut T 500 bad T 1000 kiba dang iaid ha katei ka por. Ka jingthmu ban pyllait ia ki lut T 2000 ka dei kaba la urlong haba la lah ban pynbiang ia kine ki lut tyngka katkum ka jingdonkam. Kumta, la sangeh ban shon ia ki lut T 2000 ba thymmai ha u 2018- 19.
- Kumba 89% jong ki lut T 2000 ki dei kiba la pyllait paidbah shuwa u Lber 2017 bad ki la poi sha kaba kut jong ka jingneh jong ki kaba long 4-5 snem. Ka jingdon kine ki lut tyngka ha ka iew ka la hiar na ka T 6.73 lak klur ha ka 31 tarik u Lber, 2018 (37.3% ki lut tyngka kiba dang iaid) sha ka T 3.62 lak klur kaba long tang 10.8% ki lut tyngka ba dang iaid ha ka 31 tarik u Lber, 2023. La iohi ruh ba bun ki bym pyndonkam ia ka lut T 2000 ha ka jingsiew jingdiah. Shuh shuh, ka jingdon kiwei kiwei ki lut tyngka ka long kaba dap ia ka jingdonkam pisa u paidbah.
- Namar kane, bad ha kaba bud ia ka “Clean Note Policy” jong ka Reserve Bank of India, la rai ban pynsangeh noh ia ka jingpyniaid ia ki lut T. 2000.
- Ki lut T 2000 kiba dang don kin dang iaid iew.
- Lah ban shu kdew hangne ba ka RBI ka la leh ia kum kane ka kam ban weng ia ka lut tyngka ha u 2013-2014.
- Kumta, ki paidbah ki lah ban leit thep ia ki lut T. 2000 ha ki bank account jong ki lane iakylliang ia kine ban ioh da kiwei kiwei ki lut tyngka ha kano kano ka bank. Lah ban thep ia ki lut T. 2000 kumba ju leh man ka por, kata, khlem kano kano ka jingkhang bad katkum ki ain bad ki kyndon.
- Khnang ban ym pynthut ia ki kam bad khnang ban kiar ia ka jingkulmar ha ki kam jong ki bank, ka jingkylliang ia ki lut T. 2000 sha kiwei kiwei ki lut tyngka kan don pud haduh T 20,000/- ha kano kano ka por ha kano kano ka bank naduh ka 23 tarik u Jymmang, 2023.
- Ban pyndep ia kane ka kam ha ka por kaba biang bad ban ai por ia ki briew, baroh ki bank kin plié lad kylliang pisa na ka bynta ki lut T 2000 haduh ka 30, Nailur 2023. La ai ia ki rukom treikam sha ki bank.
- Ia ki lad kylliang ia ki lut T 2000 ba la buh pud haduh T 20,000/- ha kano kano ka por ki dei ki ban pynbiang ruh ha ki 19 tyllli ki Regional Office (RO) jong ka RBI kiba don Issue Department 1 naduh ka 23 tarik u Jymmang, 2023.
- Ka Reserve Bank of India ka la ai jingmut ia ki bank ba kin sangeh ban pyndonkam ia ki lut T 2000 mynta.
- La pynshlur ruh ia ki paidbah ba kin pyndonkam ia ka por haduh ka 30 tarik u Nailur, 2023 ba kin leit thep ne kylliang ia ki lut T. 2000. Ia ka thup ki jingkylli [Frequently Asked Questions (FAQs)] ba iadei bad kane ka kam la buh ha ka website jong ka RBI khnang ba ki paidbah kin ioh jingtip ba shai.