SHILLONG 19, Jymmang: U President ka Voice of the People’s Party (VPP) u bah Ardent M Basaiawmoit u la pynbna ba un bteng ia ka jingiakhih halor ka Bhah Thungkam da kaba shah thngan naduh ka 23 tarik Jymmang haduh ba kan long kam.
Ia kane u la pynbna ha ka jingialang kaba long ha phyllaw ka Additional Secretariat hadien ba ka VPP kam hun ia ka jingpynshai ka sorkar halor ka Roster System hynrei ka kwah bad dawa ban iakren ban pynbeit ia ka Bhah Thungkam ha kaba ki nongmihkhmat jongka sha ka jingialang, kila iamih noh khlem pat wai ka jingialang kaba la khot ka sorkar MDA ia baroh ki seng sain pyrthei ban iathir ia ka Roster.
Haba pynbna ban bteng ia ka jingiakhih, u bah Ardent u la ong ba u kloi ban shong shah thngan haduh ban pynbeit ia ka Bhah Thungkam. “Haba ka parti ka la rai ban phah ia nga ban leit shah thngan, ngan leit kum u shipai jong ka parti”, la ong u bah Ardent.
Ka VPP ka la khot ia ka jingialang ban sngap ia ka rai jong ka jingialang kaba khot ka sorkar MDA ban iamir jingmut halor ka Roster System hynrei ki nongialam jongka, kila mih noh shiteng na ka jingialang hadien ba kim sngew hun ia kaei kaba la iatai hapoh.
U la bynrap, “Lada ki nud ban ong ban ym pynsngap ban pyntyllun ia ka Roster system, hadien ngi la shim ia kane ka sienjam ban pyllong ia ka jingshah thngan, wat mut ba u bah Ardent un shah thngan tang shi sngi ar sngi, haduh ba phin da pyndep, kata kaba nga kwah ban ong iaphi”, la ong u bah Ardent ha ka jingialang paidbah.