SHILLONG 18, Jymmang: Ka Khasi Jaintia Christian Leaders Forum (KJCLF) ka pynpaw ia ka jingsngewbha halor ka jingpynbna jong u Myntri Rangbah ka jylla u Conrad K Sangma ba ka jingiakren iasuk hapdeng ki Lai Kynhun kynthup ka sokar jylla, sorkar pdeng bad ka seng Hynniewtrep National Liberation Council (HNLC) kan sdang ha u bnai Jylliew 2023.
Ha ka kyrwoh ba la pyllait mynta ka sngi, u Rev Dr Edwin H Kharkongor uba dei u Secretary ka KJCLF, u la ong ba na ka bynta ki nongshong shnong ha ka Jylla, ka jingthrang bad jingwad ia ka Jingsuk ka la long kaba jlan bad kaba thohdak ha ki bun rukom. Ka KJCLF ka ithuh bad burom ia ka jingjam kaba khraw bad ka jingiaid kaba skhem jong ka seng Hynniewtrep National Liberation Council (HNLC) ryngkat ruh bad ki artylli ki kynhun kiba iadon bynta, bad ka duwai na ka bynta ka jingjop jong kane ka jingpyrshang kaba donkam.
“Wat haba lah don bun ki jingpruid lynti ha ki snem ba lah dep, ka Forum ka kyrmen ba kane ka Jingiakren Jingsuk ka ban sa long shen mynta kan wanrah ia ka jingkut kaba don ka jingthmu ba shai jingmut bad kaba ka jingkdup jong ka kan kynthup ia ka Jingsuk, ka Hok, ka Jingshngain bad ka Jingiada ia ki jaka ki puta ha ka Ri jong ngi bad baroh ki nongshnong shnong jong ka”, la ong ka kyrwoh na u secretary ka KJCLF.