SHILLONG 18, Jymmang: Ki ar tylli ki sengbhalang, ka Khasi Students Union (KSU) bad ka Federation of Khasi Jaiñtia and Garo People (FKJGP) kila dawa ba ka sorkar jylla kam dei ban kyrtiang dien haba pyntreikam ia ka Roster System hynrei ka dei ban sdang nangne shakhmat.
Ha ka kyrwoh kaba la pyllait mynta ka sngi, ka KSU ka la kyntu ia baroh ki seng sain pyrthei ba kin ieng ha ka nongrim ban pyntreikam ia ka Roster nangne shakhmat. “Ka jingmih jong ka Roster System kumba paw hi ka dei namar ka jingbthah ka High Court, Meghalaya ia ka sorkar jylla. Hynrei kaba sngewsih pat ka long ba ka sorkar jylla haba pyntreikam ia kane ka Roster System ka la kyrtiang biang shadien da kaba wanrah ia ka jingbym biang ioh kam ki Garo katkum ka bhah 40:40 katkum ka jingujor katto katne tylli ki kynhun sengbhalang na Garo Hills, bad bsut ia kane ha ki jingthung kam kiba mynta kiba la ktah shibun eh ia ki samla wad kam Khasi namar ka jingioh bhah ki Khasi mynta kam dei shuh 40% hynrei ka la hiar shuh shuh”, la ong ka KSU.
Ka KSU ka kyntu ia baroh ki nongialam seng sain pyrthei Khasi ba ki dei ban pyrshah beit ia ka jingpynphai dien ia ka roster system bad dawa ba dei ban pyntreikam beit shakhmat.
Ka la ong ba lada ka sorkar ka sngew ba ka jingphai dien ia ka Roster System ka dei ban pyndap ia ka jingduhnong ki Garo naduh u snem 1972, ka long pat kum ka jingpynshitom, jingpynsaja bad jingtei pop ia ki samla Khasi kiba wad kam mynta. Tang namar ba phi sngew ba kib mynshwa ki la bakla ym dei pat ban pynshitom ia ki samla Khasi mynta kiba luilui ki bym don bynta eiei ha ki jingjia ba mynshwa hynrei kiba kwah tang ban ioh ia la ka hok ka bhah ha ki kam sorkar, la ong ka kyrwoh na u bah Donald V Thabah, General Secretary, ka KSU.
Kumjuh ka FKJGP ka kyntu jur ia baroh ki seng saiñ pyrthei kiba don hapoh jong ka jylla Meghalaya ba kim dei shuh ban dang kyrtiang dien ia ki 50 snem kiba la leit noh hynrei ban saindur thymmai ia ki 50 tylli ki snem ki ban sa wan lada ki don shisha ka jing kit khlieh bad ka jing iohi jngai. Ka FKJGP ha kajuh ka por ka kyntu ruh ba baroh ki seng saiñ pyrthei ki ban leit sha katei ka jingialang lahshai ka sngi ba kin shim ka jingkit khlieh ba ka tarajur kam dei satia dei ban noh shiliang.
Ka FKJGP ka dawa ruh na ka sorkar MDA ba ka jing pynbeit thymmai iaka Roster System kadei ban long kat kum ka jingbun paid khnang ba ki khun samla kin ym kylla langknia ban ioh ia la ka hok ka bhah ha ki kam sorkar bad ha kajuh ka por ka FKJGP ka dawa na ka sorkar jylla ba ia ka Roster System dei ban pyntreikam sha khmat naduh ba la pynmih ia ka Hukum lane kata ka jing bthah jong ka iing kashari badon burom jong ka jylla Meghalaya (High Court of Meghalaya) bad ym dei satia ban dang phai dien trai, la ong ka kyrwoh na u bah Kitboklang Nongphlang, u Vice President ka FKJGP.