SHILLONG 17, Jymmang: Ka jingiakren iasuk hapdeng ka sorkar pdeng, ka sorkar jylla bad ka seng lehnoh Hynniewtrep National Liberation Council (HNLC) kan long ha ka taiew ba nyngkong u Jylliew ban wan.
“Hynnin ka sngi u symbud myntri rangbah u bah Prestone Tynsong u la iakynduh ia ki nongialam ka HNLC ba kynthup ia u Political secretary, u Vice Chairman bad kiwei ki dkhot nalor ki ksiang bad ka jingiakren kan sdang noh naduh u bnai ban wan”, la pyntip u myntri rangbah mynta ka sngi hadien ba la wai ka kynhun myntri.
U Myntri Rangbah u la ongg ba ka HNLC ka la rah ia ki katto katne ki mat tangba um shym la iathuh kiei ki mat ba ka seng ka la rah na ka bynta ban iakren khamtam ha ka sorkar pdeng namar ba ki don ki bym don ha ka bor jong ka sorkar jylla.