SHILLONG, 17 Jymmang : Mynta ka sngi, u myntri rangbah ka jylla u Conrad K Sangma lem bad ka myntri ka tnad ka rep ka riang ka Kong Ampareen Lyngdoh kila jngoh ia ka jaka pynkha symbai phan da ka buit stad saian ha Bio Resource Development Centre (BRDC) ha Upper Shillong.
Ia kane ka projek la pyntreikam ka International Potato Centre (CIP) ryngkat ka Meghalaya Basin Management Authority, ka tnad ka Horticulture bad ka Central Potato Research Institute, Shimla.
Ha BRDC, ki ophisar kila ai ka jingbatai halor ka buit stad saian Apical Rooted Cutting (ARC) kaba pyndonkam ban pynkha symbai ia u phan.
“Ha Meghalaya, ngi don ka jingduna phan khamtam u symbai bad ka jingpynmih phan kan kiew lyngba kane ka buit stad saian ARC”, la ong u Conrad.
Ha kane ka projek, kumba 150 ngut ki nongrep la sam symbai phan ba khot u Kufri Jyoti bad u Himalini, 500 ngut ki nongrep kila shah hikai ia ka rukom sumar, bad pynkha roi symbai, bad ha katei ka jaka la don ar tylli ki mashin ba ngiam 1 lak tylli ki symbai phan bad 15146 hectar ka jaka kaba la mang kyrpang ia u phan ne sohlah.