SHILLONG 17, Jymmang: Ka Hynniewtrep Achik National Movement (HANM) mynta ka sngi ka la pan jingshai na u Chief secretary ka sorkar Meghalaya halor ka North East Gas Grid Project.
U Secretary ka HANM-EKH u bah Bawan Donbok Nongsiej u la ong ba ka seng ka kwah jingshai, ka don ne em ia ka jaka pyndap tyndong lyer shet ha ka Meghalaya.
“Ka seng ka pdiang ia ki kam pynroi kiba wan ha ka jylla kum ka North East Gas Grid Project ha kaba kan pyniaid ia ki paip (pipe) ha ka jylla Meghalaya kaba wan na Assam ha ki saw tylli ki District kynthup Ri Bhoi, Wasr Khasi Hills, West Jaintia Hill bad East Jaintia Hills District bad poi biang sha Assam,” la ong u bah Nongsiej.
U la ong ba ka seng ka kwah jingtip la ka jingpyntreikam ia kane ka project kan ai jingmyntoi ne em ia ka jylla ha kaba ki paidbah ki lah ban trei ban ktah bad lada kam ai jingmyntoi ia ki paidbah ka seng kan pynsahngeh ia ka jingtrei jong kane ka project.
La ong ba katkum ka jinglap ka seng, la iohi ba kine ki Pipe Gas la pynrung na Assam sha Meghlaya lyngba ka Umden ha Ri Bhoi bad ka la pan jingshai la ka sorkar ka ladep ne em ban shim jaka bad ka siew ia ka bai jaka sha ki trai kyndew.