SHILLONG 14, Jymmang: Ka Confederation of Ri Bhoi People (CoRP) Western Zone ka pynrem jur ia ka riew dusmon kiba ber dawai bih ha Wahkhri ban pyniap ia ki dohkha dohum haduh ba katei ka wah ka la sma iwtung na ka jingpyiut ki dohum kha bad ka dawa ban kem bad pynshitom ia ki briew ba donkti ber dawai ha ka Wahkri ha ki khyndiat sngi
Haba kren bad u President ka CoRP-Western Zone u bah L Lapang ula ong, katei ka jingjia ka dei na ka jingkhein sting ki nongialam shnong ban ai lad ia ki paidbah ban shoh kharu wat hadien ba la mana pyrshah ba ym bit shuh ban shoh kharu, thang bom ne ber dawai ha katei ka wah namar ka pynduh jait ia ki dohum dohwah.
U Bah Lapang ula iathuh ba kane jingjia ka la jia naduh 10 tarik mynta u bnai kaba la sdang na ki thain Warmawsaw-Domphlang sharum ter ter haduh ka jaka ba kynduh ka wahkri bad ka Khrisynia ba wan na West Khasi hills bad bynrap ba ym lah ban ngeit na ka jingshoh kharu kin iap lut ki dohkha lada ym dei na ka jingbret dawai dusmon ki briew.
“Ka shnong Mawdem bad kiwei ki shnong ba marjan ki la mana tyngeh ba ym dei ban thang bom ne ai dawai ha Wahkri ban iada ia ki dohum bad khamtam ki kha masi namar ki don tang ha katei jaka, kiba heh haduh 100 kilo hynrei na kane ka jingai dawai ki dohkha ki la iap lut ha Wahkhri, u iathuh ka shnong Mawdem ka la mana ruh ia ki paidhah ban leit tam doh ha kane ka jingjia” u la ong.
Ula bynrap kane ka jingjia ka lah ban dei na jingshoh kharu katto katne ki paidbah na ki thain Warmawsaw bad Domphlang na Ri Bhoi, ki shim kabu pat ki briew ban bret dawai bad ym lah ban tip dei na Bhoi ne na West namar katei ka wah ka long kum u pud ka Ri Bhoi bad West Khasi.
“Kane ka jingjia ka long kum ka tamasa bah ban leit tam dohkha ha Wahkhri ia ki paidbah ka thain ri bhoi sepngi ban tam doh bad don kiba kit doh da ki Belero Pickup da ki hajar kilo, ki paidbah ki la kit doh da ki tone na wahkhri, kata tang kiba heh ia kiba rit ym don shuh ba peit” la ong u bah Lapang bad kyntu ia ki pulit bad ki bor distict ban shimkhia halor kane ka jingjia khnang ba kan ym jia shuh hadien habud.