Nongpoh12: U Bah Damanbait Lamare, U MLA Umroi Constituency, haka 12 tarik Jymmang 2023, u la leit ban plie paidbah ia Umroi Madan L.P School, ka skul kaba don hapoh ka shnong Umroi Madan.
Khyndiat haba iadei bad katei ka skul, la ong ba ka dei kaba la sdang ban tei naduh u snem 2009, hynrei naduh kitei ki snem katei ka skul ka don hapdeng shibun ki jingduna, namar ka jingbym biang ki kamra klas ban shong ki khynnah kiba leit ban pule hapoh katei ka skul.
Kiba la donlang haba la plie ia katei ka skul, ki kynthup ia u Bah Rangkynsai Kharbuki, MDC Umroi kum u Guest of Honour, nangta u Bah Vincent Nianglang, DMC SSA Ri Bhoi, u Bah PB Sylliang, Rangbah shnong Umroi Umdohbyrthih, u Bah Shalan Sylliang lem bad kiwei.
Haba iadei bad katei ka sngi, ba la plie ia katei ka iingskul, na ka liang u Damanbait Lamare, MLA Umroi, u la ai ia ka jingkular ba un ialeh katba lah na ka bynta ban iarap ia kiwei pat ki jingdonkam hapoh katei ka skul, khnang ba kan long ka jingkyrkhu na bynta ki khynnah kiba pule hapoh katei ka skul.