SHILLONG 13, Jymmang: Ka elekshon jied ia u MLA ka Sohiong ka la paw shynna ba ki paidbah kim mon satia ban jied ia ka NPP ha Khasi Hills. U kyrtong ka UDP u bah Synshar Kupar Roy Lyngdoh Thabah ula pynliem ia u kyrtong ka NPP u bah Samlin Malngiang da 3422 vote kaba la dep niew mynta ka sngi.
U bah Synshar ula ioh 16679 katba u bah Samlin u la ioh 13257 vote. Kiwei pat ki kyrtong ki long u bah S Osborne Kharjana ka Congress u ioh 1762 vote, u NOTA u ioh 272 katba u kyrtong ka BJP u bah Serapth Eric Kharbuki u ioh tang 40, u bah Stodingstar Thabah ka AITC u la ioh 89 bad u bah Sandondor Ryntathiang ka HSPPD u la ioh 62 vote.
Da kane ka jingjop, ka UDP ka la kiew sha ka 12 ngut ki MLA katba ka NPP kaba ialam ia ka sorkar ka don 28 ngut hadien ba wan pyniasoh ar ngut ki MLA ka PDF.
Baroh ka UDP bad ka NPP ki iadon lang ha kane ka sorkar MDA-2.