SHILLONG 26, Iaiong: Ka dorbar shnong pyllun Laitumkhrah ka la dawa tyngeh na ka sorkar jylla ba ka dei ban rah lang noh ia baroh ki Kharmetor kiba sah ha Sweeper Lane ha Lumsohra, Laitumkhrah sha ka jaka ba ka sorkar kan rah noh ia kiba sah na Them Iewmawlong.
U Rangbah Shnong ka Laitumkhrah, u bah Andrew J Jyrwa u la ong ba ka jingdon ki kharmetor ha Sweeper Lane hapoh u pud u sam ka Lumsohra, Laitumkhrah ka la long ka jingma ia ka shnong ka thaw bad ka la long ruh kum ka ktem jong ki kam bym man.
“Kum ka dorbar, ngi la iakren ia kane, ban rah lang ia ki sha jaka ba thmu ban rah ia kiba na Them Iewmawlong bad, ia kane ka jaka, sa shna ia ki ïing ia ki briew kiba duk, lada ym lah shna ka ïing, shna noh kano kano ka ïing ba ka sorkar ka lah ban pyndonkam na bynta uba bun balang. Ngi kyrpad ba hap ban weng noh ia kine nangne”, la ong u bah Andrew haba iakren mynta ka sngi.
Hynrei ha kajuh ka por, u la pynpaw ia ka jingbynniaw namar ba watla ka dorbar shnong ka la ai jingthoh haduh ba la rben ka File ruh, hynrei ym don ba sngap bad ka la pynsuba jur ba imat ka lah ban don eiei ka jingiada ia ki.
“Kine ki briew kiba ioh ia ka jingiada jong ka sorkar, ki shna ia ki ïing katba mon, la ujor ruh ym don ba sngap, lada shna ki trai tang shu bakla khyndiat ka MUDA ka la wan ban pyni bor, lada ym lah ban kohnguh ia ki jingbthah jongka, kam ai ia ka Occupancy Certificate (OC), lada ym ioh ia ka OC, ban ring ding, ban tan um ruh ym ioh katba ia kiba sah beaiñ ha Sweeper Lane ha Lumsohra, ki shna ïing katba mon, ki pynheh ïing katba mon, ka bording, ka um ruh ki ioh beit thik thik, haba ngi ujor ym don ba sngap”, la ong u bah Andrew.
U la ong ba lada ka sorkar kam shim khia, ka jynjar bha ia ka dorbar shnong. U la ong ruh ba lada ki paidbah ki pyntuid ia ki painkhana sha wah kin shah dain duna kaba heh bha hynrei ia kine ki kharmetor ym don ba leh eiei watla ki pyntuid ia ki jaboh na painkhana sha wah, ym don ba shain kuna eiei ia ki. “Balei ka sorkar ka leh shiliang ia ki?”, u la buh jingkylli.
“Imat ki don ki kynja ba iada ia ki hynrei kumno ki shna ïing man ka sngi, la pynkhapngiah ka kali jongki ha surok, ngi la iakren man ka por, la ujor man ka por khlem don ba sngap”, u la bynrap.
U la iathuh ba ha ka por Covid-19, haba rung sha jaka sah jongki, ka ishyrkhei bha, ym ioh jingkhein shuh katno ngut ki don ki ïing, katno ngut ki don ki nongshong shnong bad man ka sngi ki ju don ki dur thymmai suda.
Ym tang katta, u Rangbah Shnong ka Laitumkhrah u la ong ba wat mynsngi mynshai ruh ka don ka jingtieng kaba shyrkhei khamtam ha ka por mynmiet ha kaba ki briew na katei ka jaka ki leit rung sha shnong, ki leh baheh, kynroi bad ka long ka jingma kaba shyrkhei bha.
“Haduh mynta kam ju don ka jingkhot na ka sorkar ia ka dorbar shnong ban iakren halor ka jingai jingthoh ban weng noh ia ki na katei ka jaka, lehse ba ka dei ka jaka sorkar, ki lah ban leh katba mon”, u la ong.
U la ong ba ka jingthoh ban weng noh ia ki la shlei ym duna ia ar tylli ki File ba rben bha kynthup sha ki Deputy Commissioner, sha ki Myntri pynroi sor, sha u Chief Secretary, shaduh ki Myntri Rangbah bad kumjuh sha ka MLA ka thain.