SHILLONG 26, Iaiong: Ka KSU South West Khasi Hills District kala rah ia ki mat ha ka myntri ka tnad ka koit ka khiah ka jylla ka Kong Ampareen Lyngdoh na bynta ban pynbha ia ka tnad ka koit ka khiah ha South West Khasi Hills District bad hapoh ka Mawsynram C&RD Block.
Ka la pynsngew ha ka myntri ban pynbiang ia ki tiar jingsumar ha Hospital 100 Jingthiah ha Mawkyrwat, nalor ki nongtrei. Kane ka jaka sumar kaba la plie paidbah ha u bnai Nohprah 2022 ka donkam ia ki nongtrei ha ka X -Ray bad kumjuh ruh ban wanrah iaki machine ha Intensive Care Unit, ban thung ia u Medical Superintendent ba pura, ki nongtrei, ban pynbun iaki kali kit Nongpang, ban pynbiang iaki tiar bapher kum ki Almari, ki jainsiang, syngkhlieh, ki tiar hapoh Operation Theater Department, ki Generator ban pynbit pynbiang iaki jingdonkam bad ban pynbiang ia ki jingdonkam hapoh Hospital naduh ka kamra Nursing Superintendent, ka umbam umdih bad ban pynbiang ruh iaki jingbam kiba tei na bynta ki nongpang hapoh kane ha Hospital.
Kiwei pat ki long ban mang pisa ban shna noh iaka Office District Medical and Health Officer, nangta ka jingdonkam hapoh Wahkaji PHC, ban plie bad pyntreikam noh iaki Health Sub Centre ba la dep shna.
Ha kaba iadei bad ha Mawsynram C&RD Block, ka long ban pynbiang ia ki jingdonkam hapoh ka Mawsynram CHC kum ka Ultrasound bad X-ray nalor ba ka donkam shuh shuh ban don sa kawei ka Ambulance. Ban buh sa kawei ka Health Sub Centre ha shnong Mawhiang, ban wanrah noh daka Health Sub Centre ha shnong Jyllep, ban kyntiew kyrdan noh iaka Dangar PHC sha ka CHC. Ia kane la soi da u bah Forwardman Nongrem bad bah Jiedskhem Nongsiej kiba dei u President bad u General Secretary, KSU South West Khasi Hills District .