SHILLONG 26, Iaiong: Ka jingthmu ka sorkar ban pyndep ia ka jingshna pynheh ia ka surokbah Shillong-Dawki kan nang slem shuh namar ba ka NHIDCL kan hap ban khot tender biang ia ka song 1, 4 bad 5 na ka daw ba ki kompeni ki iehnoh shiteng ia ka jingtrei.
U symbud myntri rangbah ka jylla uba dei peit ia ka tnad PWD u bah Prestone tynsong u la pyntip ia kane ha ka sngi Baar hadien ba iashong jingialang bishar kam bad ki briew ka NHIDCL halor ka jingiaid ki kam jong kane ka surok kaba la mih bun ka jyrwit jyrwat. Ia kane ka surok la bei pisa ka Japan International Corporation (JICA) ha ka jinglut kaba 12 spah klur tam.
Ha kajuh ka por, ka NHIDCL ka la pynkut noh ia ka kam jong ka kompeni ARSS kaba la ioh ban shna ia kane ka surok.