WEILYNGKUT 23, Iaiong: Ka jingialap elekshon ha Sohiong ka la sdang shit bha mynta bad ha kane ka sngi Saitjain, ka NPP ka la pynskhem ia ki nongkitkam jong ki samla ha kaba la wan sakhi lang u national vice President ka NPP u bah Prestone Tynsong, u kyrtong ka NPP u bah Samlin Malngiang bad kiwei.
“Ha ka 7 tarik Lber 2023, ngi iathaw sorkar, bad u shabi uba heh tam la bat ki 26 ngut, bad hadien ka 13 tarik ngin sa bynrap sa uwei bad uta u dei u bah deng Samlin”, la ong u bah Prestone.
Haba kren ha ka jingialang kaba la wan ki nongkyrshan ka thain Weilyngkut hapoh Sohiong konstiwensi, u la kyntu ia ki nongkyrshan ban iawer ia kiwei pat kiba dang artatien ban ym sngewthuh bakla shuh.
Da kaba kam kum u trai ia ka NPP kaba ialam ia ka sorkar, u bah Prestone u la ong, “U trai te u trai, ki kliar te ki kliar, lada phi kwah da ka sha dud phah ia u bah Samlin, lada phi kwah ia ka sha dud kaba khlem shini, jied iano iano ruh biang beit hynrei lada phi kwah ia ka sha dud kaba bang, ka dud kaba khlein kaba shngiam, ka shini ruh phi kwah shiphew shamoit ruh ioh hi, jied ia u Samlin”.
U la bynrap, “Balei, namar une (Samlin) u long u para khadduh jong u Conrad bad u Prestone, un don ha syndah jong ngi”.
U vice president ka NPP uba dei ruh u Symbud Myntri Rangbah u la ong ba ka Sohiong ka dei kaba la kha donbok u Blei namar ba ha kane ka kynti ka NPP kan tam don burom. “Hooid lada thep vote ha ka 27 tarik Rymphang 2023 ngi la thikna ban jop tangba ka jingjop ka long kaba salit hynrei mynta ngi dei ban jop don burom ym duna ia ka 6 hajar vote.
U ther ia kito kiba la thmu ban wanrah ia ka jingsngew wat ha ka iap ka im ruh. “Ngi kwah ban jop don burom, ngi phah ka jingsngew lem ia I Late HDR Lyngdoh, u Blei u la ibit ban shimti noh sha lade bad u Blei pat u la ibit ia u bah Samlin ban shimti ia ka kam naduh u 2018. Kane ka dei ka jingpyniaid jong u Blei, kam dei ka jingpyniaid u briew, kaba ishyrkhei ka long teng teng ia ka kam kaba u Blei u leh, kynnoh sha u briew haduh teng teng ban ong bym shah ban leit sha ba iap ba im ka long mo. Wat pyniakhleh ia ka kam u Blei bad kam u briew. Ia ka jingim jong u briew ka shong ha lynhoh kti jong u Blei”.
Haba kyntu ia kiwei kiba ialeh ia ka elekshon ban ym ialam bakla, u bah Prestone u la ong, “Don kiwei kiba ong ba ka NPP ka dei kaba isih ia ki rit paid, hynrei nga kwah ban ong, sngewbha kren beit ia ka jingshisha, ynnai ialam bakla ia ki paidbah namar ba ia ka sorkar la dep thaw naduh 7 tarik Lber 2023”.
Ha kajuh ka por, u la ong, “ka sorkar NPP hapoh ka jingialam u Conrad K Sangma bad u bahduh Prestone, ngi la buh ia ki mat ba kongsan ka rep ka riang, ka pule puthi, ka koit ka khiah, ka jingai kam ia ki samla 5 lak ngut hapoh san snem kynthup ka kam sorkar bad kam lajong”.