SHILLONG 22, Iaiong: Ka Harijan Panchayat Committee (HPC) ha ka sngi Thohdieng ka la takrain ia ka sorkar jylla ba ka shu pynbor bad pyntieng kohtympan ia ki ban mih noh na Them iewmawlong wat haba kam pat pyni shai ia ka jingpynkhreh jongka.
Ka sorkar jylla ka la pynkhreh ban tei ia ka ïing hynniew mala ha Bivar Road na bynta ban pynsah ia ki briew na Them iewmawlong khnang ban pynitynnad bad shna dukan heh ne shopping mall noh ha katei ka jaka.
U secretary ka HPC u Gurjit Singh u la kam ba ka sorkar kam shym la pyni ia ka jaka ban shna ia ki iing sah jongki hynrei ka la shu pynbor bad pyntieng kohtympan ba ki dei ban mih noh bad ia kane ka kam yn pyndep mynta u bnai Iaiong.
“Ngim hun ia ka jingdro dur kaba la pynkhreh ka sorkar jylla. Ngi kwah ban ioh ia ka jingshai kaba bniah halor kane hynrei imat kumba ka sorkar ka kwah ban shu kynthih bad ka bym lah ban pdiang da lei lei”, la ong u Singh.
U la buh jingkylli kumno ka sorkar ka lah ban shna ia ka ïing kaba 7 mala kaba long pyrshah ia ka ain shna ïing ka byelaws.
U Singh u la iathuh ba ka sorkar ka lah ban shna ia ka ïing ha Bivar Road ha ka jaka kaba don ka ophis ka Shillong Municipal Board (SMB) mynta.
Ha kajuh ka por, u secretary ka HPC u la ong ba ki dang ap ia ka jingkhot ka sorkar ban iakren ia kane ka kam kham bha.