Ka High Court ka Meghalaya ka la kynthah ia ka sorkar jylla ba ka jingpynkhreh ia ka Roster System kam long kaba shai, kaba biang bad kawei na kine, ka dei halor ka jingbuh snem ba kan treikam. Ka Roster System ka mih na ka Reservation Policy ka sorkar jylla kaba la sdang naduh u snem 1972 hynrei haduh mynta, kam don ka rukom bhah ban thungkam kaba shai ne ka Roster system hapdeng ki jaitbynriew kynthup ia ki Khasi-Jaintia bad Garo.
Ka jingwan rah ka parti thymmai ka Voice of the People Party (VPP) ha kane ka Assembly ba dang shu dep ia ka mat ban peit ne pyrkhat biang ia ka Reservation Policy bad ka Roster System katkum ka rai jong ka Meghalaya High Court ba donburom ka la pynkhie im biang sa shisien ia katei ka mat kaba ktah mat iong ia ka iohkam iohjam ki khun samla jongka ri Khasi-Jaintia jongngi.Wat la ki seng bhalang baroh na Garo Hills ki pyrshah ia iap ia im halor kane,ki kynhun na Khasi-Jaintia te kin iai ktik beit ba ki shah long langknia ei ha katei ka policy.
Ka jingpynkhie im ia katei ka mat ne issue kan pynktha khlieh shi katdei eh ia u Chief Minister ka Meghalaya lem bad ki kynhun jongu.La iohi ruh ba katei ka system ka la phiah arliang ia ka Meghalaya ha ki ar kynhun ki jaitbynriew (ST), kata, ki Khasi-Jaintia bad ki Garo. Kumba ka long mynta, katei ka policy ka pynioh nong eh ia ki jaitbynriew Garo. Lada ka sorkar kan pynhun ia ki Khasi-Jaintia ruh ka la wanrah ka jingeh ha Garo Hills. Bad lada ka pynhun pat ia ki jaitbynriew Garo kumba long mynta, kan wanrah jingeh ha ri Khasi-Jaintia ruh. Kan don ka jingktah ruh wat ia ka lawei jong ki seng sain pyrthei kiba ia don lang ha kane ka sorkar MDA-2, la ki long ki seng trai ri ne ki seng heh ne National parties. Lada kane ka sorkar MDA-2 ka leh mynthi ruh ki paidbah kin nym aili satia ia ka. Lada kane ka thma ioh kam sorkar kan khie shisha, ka jingiadei hapdeng ki jaitbynriew Khasi-Jaintia bad Garo kan nang ia jngai nang ia jngai shuh shuh bad kan sa poi ka por ba ki lah ruh ban ia khlad lok noh shisha da kaba ai noh ia la ka jong ka jong ka state jongki.
Kane ka mat ka long ruh kaba don jingma bha haduh katta katta. Lada ka sorkar u Conrad Sangma kan bakla rai hangne,kan sa jot artad baroh shi rta bad kan shitom ruh ban khie khlieh biang hadien habud. lada ai ruh ym long bad lada ym ai ruh ym long, U la wai lada u leh bad u la wai ruh lada um leh.
Ka rai ka Meghalaya High Court ba ia kane ka kam, ka donkam ban iathir ha ka ïing dorbar bad ka shong ruh ha ka rai ka sorkar, kan plie lynti war ia ka sorkar jylla ba kan ym lah shuh ban leh mynleh ban pynjah haba wanrah ki liangpyrshah ia kane ka mat ban iakren hapoh ka ïing. Ha kane ka dorbar kaba dang shu dep shen, ki MLA ka liangpyrshah ka VPP kila pyrshang ban rah ia kane ka mat hynrei na ka liang ka ïing dorbar ne ka liangsynshar kam shym la kwah than namar ba ka lah ban don ka jingiatai kaba khluid. Hynrei kumba ka paw, la sngewthuh shai mynta ba kane ka mat kan sa paw biang ha ka dorbar ban wan, namar ba ka liangpyrshah ka kwah ban iakren ban pynbeit ia ki jingdkoh ha kane ka bhah thungkam hapdeng ki jaitbynriew ha kane ka jylla.