SHIllONG 14, Iaiong: Ka sorkar jylla ka la khih khohreh ban pynim biang ia ki wah kiba la jan dkut mynsiem syndon na ka jingjubor palat ka jingjaboh na ki kam jong u briew kiba don sawdong ka sor Shillong.
Ka jingialang bad ki kynhun bapher bapher naduh ki dorbar shnong, ki tnad sorkar, bad kiwei ka la iathir ban pynim ban pynkhuid biang ia ka wah kynthup ia ka Wahumkhrah, Wah Umshyrpi bad ka Wah Umkhen ha kaba la sakhi u Myntri Rangbah u Conrad K Sangma, u Symbud Myntri rangbah u bah Sniawbhalang Dhar, u myntri bah A L Hek, u Chief Secretary bah Donald P Wahlang bad ki nongkitkam jong ki dorbar shnong bapher bapher nalor ki kynhun seng treimon sngewbha.
Ha ka jingkren maitphang, u myntri rangbah u Conrad K Sangma u la ong ba ka jingthmu jong kane ka jingialang ka long ban wad ia ki jingduna bad ban thaw lad kumno ban pynkhreh ban pynkhie im biang ia ki lai tylli ki wah jong ka nongbah Shillong. U Myntri rangbah u la khot ia ka jingiashim bynta jong ki dorbar shnong bad kumjuh ia ka jingai jingmut jongki halor kane ka jingthmu.
U Myntri Rangbah u la ban jur ia ka jingdonkam ban thew tarajur hapdeng ka jinglong ki sawdong sawkun jong ka mariang lem bad ka ioh ka kot. “Ka jingialang mynta ka long shi bynta na bynta ka jingthmu kaba iar jong ka sorkar jylla ban don ka jingthew tarajur ia ka jingim, ka ioh ka kot bad ki sawdong sawkun khnang ba ka jingdonkam ha ka kamai kajih la leh katkum ka jingkitkhlieh ban iada ia ka mariang bad ban pynneh bad iada na bynta ka lawei”, la ong u Myntri rangbah.
U la ong ba ka sorkar ka kut jingmut ban pynkhie im biang ia ki wah bad ban pynjyrngam ia baroh ki um ha ka jylla.
U la wanrah ia ki kam ba ka sorkar ka la leh ban pynduna ia ka jingkylla ka mariang, ki nala, bad ka jingpynkhuid ia ki jaboh, ban pynduh ia ka jingpyndonkam ia ki plastik, ban pynduna ia ka jingjaboh na ka lyer da kaba pynshlur ia ki paidbah ban pyndonkam da ki kali ilektrik, ban pynshlur ban thung dieng bad ban iashim bynta ki paidbah ban iada ia ka mariang.
Shwa ia kane, u Chief Secretary, bah Donald P Wahlang ha ka jingbatai lyngba ka kor komputor u la ong ba ki don ki jingbthah na ka NGT bad na ka kashari ban weng ia ki jingjaboh jong ki wah. U la pyntip ba ka wahumkhrah bad ka umsyrpi ki dei napdeng ki 45 tylli ki wah ha ka ri kiba jaboh tam katkum ka thup jong ka NGT. U la khot ia ki dorbar shnong, ki kynhun bad ki paidbah ban iashim bynta ban pynkhie im biang ia kine ki wah ba kin long kiba khuid kumba long mynshwa.