SHILLONG 19, Iaiong: Ka leit ka wan jong ki kali ka dang syier bha ha Rngain ha jaka ba hap ka twa dang shen mynta ka taiew ba la dep.
Ka jingbym shngain ka dei namar ba katei ka jaka kaba hap ka twa ka ima bha namar ba la pynap da ki maw ramsong kiva heh, kiba lah ban syntuid ha kano ma ka por na ka jingtih ia ki maw.
Ha ka 14 tarik Iaiong 2023, ar ngut ki briew kila shah rong ha ka twa ryngkat ka kali ba ki shong hadien ba ki mawbah mawsan kila hap kynsan na ka jingtih maw ha katei ka jaka.
Haduh mynta ki briew ki dang sah ha ka umdum mano ba tih ia katei ka jaka watla ka kompeni ARSS ka dei kaba ioh kontrak ban shna ka katei ka surok hynrei la don ka jingkynnoh ba ka kompeni kala ai ha kiwei ki briew ban tih maw ha katei ka jaka.
Na ka liang ka SDO, Pynursla dang shen ka la ong ba ia kiei kiei baroh yn sa tip hadien ba la dep ia ka jingtohkit jong ki pulit. La ujor ejahar ruh halor ka jingjia kaba ialam haduh ka jingkhlad ki my siew briew.
U symbud myntri rangbah ka jylla u bah Prestone Tynsong ha ka por ba u wan jurip ia katei ka jaka, ula ong ba la bthah ia ka kompeni NHDCL ba kan wanrah da ki stad ban pule bniah ia ka jinglong jingman katei ka jaka shwa ban tih, namar ba kam long ban shu tih pathar na ka jinglong syier bha jong katei ka jaka.