Shillong: Ki bynta ka ophis jong ka Meghalaya State Pollution Control Board (MSPCB) ha Shillong, ka la iong kynsan ngain na ka jingshah ther petrol bomb.
Kane ka la jia mynta ka sngi lah sngi u Blei, ha kaba ar tylli ki petrol bomb kila dei tain ha ki bynta ka ophis katba ki nongtrei ki dang don hapoh ka ophis. Hynrei ha kane ka jingjia, kam don kano kano ka jingmynsaw.
U Member Secretary ka MSPCB, u Dr. George Hagi Chyrmang, u la ïathuh ba ka la jia hapdeng ka por 12 baje haduh 12:30 nohphai sngi, ha kaba ar ngut ki briew kiba la kah durkhmat bha ki la wan da ka scooty, rung shapoh phyllaw jong ka ophis bad kawang ïa ar tylli ki petrol bomb shuwa ba kin phet noh na katei ka jaka.
Mar mar, la pyntip sha ki pulit jong ka Laitumkhrah Police Station, kiba la poi mardor sha katei ka jaka ban sdang ïa ka jingtohkit. Ka kynhun Forensic Crime Scene Unit ruh ka la leit ban lum ïa ki sakhi bad ki sabut kiba donkam na ka bynta ka jingtohkit.
Ka la don ka jingsuba ba kane ka jingjia ka lah ban don jingiadei bad ka jingpyllong iaka jingsngap paidbah ne public hearing ha East Jaintia dang shen, ban ai jingbit ban tih mawshun ka kompeni Shree Cement Pvt Limited hynrei ym pat lah ban pynskhem eiei namar ka jingtohkit ka dang ïaid shakhmat.
Shiteng sngi, iong ngain ki bynta ka ophis ka MSPCB ba shah ther petrol bomb
