Shillong: Uwei u rangbah na ka Hima Langrin ula ther tyngeh ia ka seng Voice of the People Party (VPP) ba ka jingleh jongka ia ka kam Syiem ka Hima Langrin ka kham palat ban ia kiwei ki Executive Committee jong kiwei kiba rim.
Une u rangbah ula ong ba ka VPP kaba kam ba ieid jaitbynriew bad kaba kular ban ai ka jingsynshar kaba khuid hynrei ka jingleh jongka, ka la pyndiaw pynsngewsih kthang ia ki khun ki hajar ka Hima Langrin.
Ia kane ula kren hadien ba la mih na jingiakren bad u CEM ka KHADC bah Winston Tony Lyngdoh, ha kaba ka Executive Committee kam lah ban ai ia ka rai halor ka jingdawa jong ki paidbah ka Hima ban weng ia u Paiem Nongtei Singh Syiem na ka khet.
Shwa ia kane, ki khun ki hajar ka Hima Langrin kila byrngem ban wan tur biang sha KHADC ban shah thngan khlem pud syndon hadien 15 sngi lada ka KHADC kam leh eiei ban weng ia u paiem Nongtei Singh Syiem.
Kine ki khun ki hajar kila wan tur puk ban dawa ban weng noh ia u paiem Nongtei Singh Syiem namar ba kila kynnoh ba ula pynkhein ia ka rukom pyniaid Hima bad ula kam ei ia ka jaka ka Hima kum ka jaka ka kmie jongu. Kila kynnoh ba um shah shuh ban long ki dkhot ka dorbar Hima ia ki khun ki hajar kiba la dap 18 snem bad dei na kane ka daw kila pyrshah jur ia u.
Hakhmat ka khyrdop ka KHADC, ther u rangbah ia ka VPP| yn wan shah thngan hadien 15 sngi
