Shillong: Ka Khasi Hills Autonomous District Council (Regulation and Administration of Land) (Amendment) Bill 2026 ka thmu ban mang jaka lem ia kiba duk bad kan tehlakam ia ka jingklun jaka ki heh spah jong ki jaka Raid, jaka Hima, jaka shnong.
Ia kane la ong u Executive Member ka KHADC ba peit ia ka tnad khyndew ka shyiap, bah Powel Sohkhlet.
Haba pynshai halor ka jingshah thalain ba ka KHADC ka la set sbak bad pynduh bor ia ki Hima, ki Raid, bad ki Rangbah Shnong, u bah Powel u la ong ba kane ka ain ka long ban pynthikna ba kiba duk ki bym don jaka, ki dei ban ioh jaka na ki Hima, ki Raid ym ban klun da ki heh spah.
Haba kren sha ki lad pathai khubor, u bah Powel ryngkat u MDC shu sieh bah Mathew Kenneth Makdoh, ki la ong ba don ka Raid kaba la ai jaka ia u riew shimet haduh 100 akar, katba kiba duk pat kim ioh eiei tang namar ba kim don pisa. Kane ka ain kan tehlakam ia kane ka rukom kaban ailad ban klun ki riew shimet heh spah.
Kila ong ba ka Council kam don eiei ka jingthmu ban knieh ia ka bor shnong bor hima, bor raid hynrei ka Council ka tyrwa ban iatreilang.
U bah Powel ula ong ba ka Council ka la weng noh ia ka kyntien iasyllok bad ki nongsynshar namar ba lada pyllong ia ka jingiasyllok bad baroh ki Raid, ki Hima, kan shem jingeh ban buh pud ne ceiling ia ki ban ai jaka sha ki briew namar ba ki don da ki spah ki Raid.
U Bah Powell Sohkhlet u la ong, kumba ka VPP ka ju kren ba kan pynneh ïa ka khyndew ka shyiap kumta ruh kan ïeng skhem ha ka nongrim bad ban ïarap ïa kiba duk basuk ki bym don jaka.
U la ong ba lada ym leh mynta kan poi ka por ba ki jaka Hima, ki jaka Raid bad ki jaka shnong kin sa long tang jong ki riew shimet bad ka pateng ban wan kan sa tim lada ym leh eiei.
Don ka raid ba ioh jaka u briew 100 akar, shaei lawei kiba duk|Ngi la weng ia ka kyntien iasyllok: Powel
