SHILLONG 23, Jymmang: Ka Shillong Lajong FC sa shisien ka la lah ban wan phai biang sha ka lympung 1st division jong ka Indian League hadien ka jingiakhun kaba iakhaid bha hala ïing ha ka 21.05.2023 ha madan ka SSA, Polo, Shillong pyrshah ia ka Benguluru United FC. Ka Lajong ka la khur jingjop da 2-1, bad ia ki 2 tylli ki kol la thep u Everbrightson Sana Mylliempdah ha ka kylla step bad pynbud sa u Figo Syndai haka kylla miet.
Na ki 5 tylli ki kynhun kiba iakhun iaka kylla ba khadduh ne final round ka Shillong Lajong FC ka la dei ka kynhun kaba rung nyngkong da kaba kala ioh khur jingjop 2 sien bad iakhaid shisien rem de shisien, bad sa kawei pat ka kynhun ka ban rung sha kane ka lympung ka dei ka Delhi FC ne ka Ambernath United na Mumbai ki ban ialehkai haka 26 Tarik mynta u bnai hi.
Ha lyndet jong kane ka jingjop ka dei kongsan na u Coach u bah Bobby L Nongbet. Ka kynhun Lajong ka la ai burom ia u coach namar ba u la long ka daw ba kongsan tam, namar khambun na kine ki khynnah ki dei kiba ma u hi u la pynshitom bun bun tylli ki snem bad ban ioh kheit ia ki soh kiba thiang watla ki nongialehkai ki dang lung ha ka bor pyrkhat pynban hapoh ka jingialam u Head coach Bobby ryngkat ki Coach nongiarap kum u Asst. Coach Lekini Suting bad Asst. Coach Milan Nongkhlaw bad kiwei de kiba la trei shitom naka bynta kane ka ka jingjop.
Ka jingiadon bynta bad kylluid mynsiem ki dkhot ka Shillong Sports Association ka dei ban ai jingiaroh wat hapdeng ki jingeh kiba bun.
Ka Shillong Lajong ka la ai khublei kyrpang ruh ia ka tnad ialehkai khamtam u myntri Bah Shakliar Warjri uba lashah ban pynlong ia kane ka jingialehkai wat hapdeng ba ka jingmaramot ia ka madan lehkai ka dang iaid shait shait. Ka la ai khublei ia u Myntri Rangbah u Conrad k sangma bad kiwei ban ioh ia kane ka madan lehkai kaba biang nadong shadong bad ia ka Meghalaya Football Association kaba ka lashah ban don ia ka second stage match bad ruh ban ioh iaka madan ban kilan met (practice).
Ka jing sngewnguh kaba khraw eh ka long sha baroh ki nongkyrshan jong ka Shillong Lajong FC kiba wat hapdeng ki jingduh bor duh mynsiem hynrei ki iai ai mynsiem ban lah ban poi sha ka thong bad ka Lajong ka khmih lynti ba kin nang pynrhem ia kane ka club da ki jingai mynsiem jong ki nangne shakhmat.