Shillong: Ka Khasi Jaiñtia Welfare Association Research Cell (KJWARC) kum shi bynta ban rakhe ïa ka Thomas Jones Day 2026, ka la pynlong ïa ka Lympung Phylliewjingmut (Panel Discussion) halor ka phang “Ki Dak AB u Thomas Jones: Ka Jinglong Kawei Ka Jaitbynriew Khasi Baiar” ha Khasi National Dorbar Hall, Mawkhar, Shillong, ha ka 20 tarik Jylliew 2026. La pynlong ïa kane ka prokram hashwa ka Thomas Jones Day kaba dei ha ka 22 tarik Jylliew khnang ban lait na ka jingïatyngkhuh bad kiwei pat ki prokram ba la pynbeit da kiwei ki seng bad kynhun.
Ha ka bynta kaba sdang jong ka prokram la pynïaid da u Bah S. S. Rynjah, Secretary jong ka KJWA Research Cell. U Prof. S. S. Majaw, Chairman jong ka KJWARC, u la ai ka jingkren lyngkot halor ki kam bad ki matti bakhraw jong u Thomas Jones ïa ka ktien Khasi bad ka jingroi jong ka thoh ka tar Khasi. U Bah Ïaitrei Warjri u la pynsngew ïa ka jingrwai kyrpang, katba u Kongsan, Rev. (Dr.) O. L. Snaitang, u la ai ka jingkren kaba ban jur halor ka jinglong kawei ka jaitbynriew da ka jingsaiñdur jong ka ktien, ka kolshor bad ka kur. Ha kane ka sngi la pyllait paidbah ruh ïa ka kot “Pan Kwah: Jah Kwah” ba la thoh da I Dr. A. J. Lymba.
Ha ka bynta kaba ar jong ka prokram, la pynlong ïa ka jingïaphylliew jingmut kaba la pynïaid da u Bah Kyrmen Uriah, Chief Editor jong ka Shillong Mail. Ki riewshemphang kiba la shim bynta ha kane ka jingïakren ki long:
1 Rev. R. K. Sutnga, u Pastor ba peit ïa ka Balang Sutnga District hapoh ka Sutnga Presbytery.
2 Bah Banlam Kupar Lyngdoh, Assistant Teacher ha Ramakrishna Mission Higher Secondary School, Sohra, dkhot jong ka Khasi Authors’ Society bad Secretary jong ka Dorbar Elaka Mawmluh.
3 Bah Mankular Lamin Gashnga, Editor jong ka kotkhubor Khasi kaba mih shisien shi bnai “Kemmo Por”.
4 Dr. Fabian Lyngdoh, Ex-MDC and Ex-Chairman ka KHADC, nongthoh kotkhubor bad nonghikai ba la shongthait na Martin Luther Christian University.
5 Bah Babu Kular Khongjirem, Senior Teacher jong ka KJP Girls’ Higher Secondary School, President ka KJDSA bad nongthoh kotkhubor.
Ka jingïakren ka la pynleit jingmut halor ka bynta ba kongsan jong ka ktien Khasi kum ka jingïadei kaba pynïatylli ïa ka jaitbynriew Khasi baroh kawei. Ki riewshemphang ki la ban jur ba ka jingwanrah jong u Thomas Jones ïa ka dak Roman ha ka thoh ka tar Khasi ka la long kawei na ki jingnoh synñiang kiba khraw tam ha ka histori jong ka jaitbynriew Khasi namar ka la plie lad ban don kawei ka rukom thoh bad pule kaba lah ban pyndonkam da ki Khasi ha kylleng ki thaiñ.
Ha kajuh ka por, ki la ïathir ruh halor ka bynta jong ki ktien shnong ne dialect. La kdew ba ki dialect ki dei ka jingriewspah jong ka kolshor bad ka jinglong kyrpang jong ki thaiñ bapher bapher, hynrei kim dei satia ban long ka daw jong ka jingïakhlad ne jingïapher para Khasi. Ki panelist ki la pynpaw ba ka jingïatylli ka jaitbynriew ka dei ban shong nongrim ha ka jingïaineh ha kawei ka ktien paidbah bad ha kajuh ka por ban burom ïa ki jingpher kiba don ha ki thaiñ bapher bapher. Ki la ban jur ruh ba ka ktien Khasi ka dang long haduh mynta ka atiar kaba khlaiñ tam ban pynneh ïa ka jingïalong kawei, ka jingïohi jngai bad ka jingïadei hapdeng ki Khasi.
Hadien ka jingïakren la plie lad ïa ki nongwan jingïashim bynta ban buh jingkylli bad ïoh ruh ïa ki jubab na ki panelist. La pynkut ïa ka prokram da ka jingai khublei na u Bah P. R. Shabong, Convener jong ka prokram.
Kane ka prokram ka la khring ïa kumba 100 ngut ki nongwan jingïashim bynta kiba kynthup ïa ki samla pule, ki nongwad bniah, ki nonghikai, ki nongïalam sengbhalang bad kiwei ki riew pawkhmat.
Ka Khasi Jaiñtia Welfare Association – Research Cell ka la pynlong ïa ka jingïaphylliew jingmut halor ka phang “Ki Dak AB u Thomas Jones: Ka Jinglong Kawei Ka Jaitbynriew Khasi Baiar”
