Shillong: Ka Khasi Students Union South East Central bad ka FKJGP Riwar Mihngi circle ka la maham ia ki mynder kiba kylla jait Khasi da ka Tang Jait khamtam kiba sah ha khappud ka India bad Bangladesh.
Ha kajuh ka seng, ka la dawa tyngeh ba ka bor sorkar ryngkat ki bor shnong ba ki dei ban phikir bad bishar bniah bha ban pynrung kyrteng ia ki briew ha ka thup ki nongthep, kaba ka tnad Election Commission of India ka dang pyntreikam mynta ia ka Special Intensive Revision (SIR) ha ka jylla.
Haba kren sha ki lad pathai khubor, u Secretary FKJGP Riwar mihngi Circle Meborbaskhem Thabah ula ong ba kine ki ar seng, kila lap ba ki don ki dkhar kiba shu kylla jait Khasi da kaba tang jait watla ki kmie ki kpa ki dei ki dkhar hi bad kane ka jingleh ka la buh jingma ia ka jaitbynriew.
Kila kyntu ia ka district council ba kan shim khia ia kane, ha kaba la kynnoh ba kine ki dkhar kila ioh lad ban tang jait bad kila kyntu ia ka district council ban leh eiei halor kane.
Ha kajuh ka por, ka seng ka la ai jingthoh sha u SDO Civil Sub-Division Pynursla ban shim khia haba pyntreikam ia ka SIR namar ba ki seng kila lap ba don ruh bun ki bym dei Khasi, kiba shim jait Khasi ha ka thain khappud ka India bad ka Bangladesh.
Tang jait ki dkhar ha khappud Bangladesh sha ki jait Khasi| ka SIR ka dei ban weng ia ki: KSU & FKJGP Riwar
