Shillong: U Returning Officer jong ka elekshon MP sha Rajya Sabha, u Malthus Marak ula pynbna ia u James PK Sangma kum u MP ka Rajya Sabha.
Kane ka long hadien ba ym don nongialeh pyrshah ia u. Ia u James la jied da ka sorkar MDA-2 ban long kum u Kyrtong ka Rajya Sabha na ka NPP, kaba ialam ia ka sorkar ha ka jylla.
U James ula thep kyrteng ha ka 7/6/2026 katba na ka liangpyrshah khlem don ba iakhun pyrshah ia u Bah James bad halor kane, la pynbna ia u kum u MP ka Rajya Sabha khlem da don nongialeh pyrshah.
Ha ka jingshisha, la buh ban thep vote ha ka 18 tarik mynta u bnai hynrei namar bym.don kiba iakhun pyrshah, hadien ba la kut ka sngi thep kyrteng bad ka sngi weng kyrteng, u Returning Officer ula pynbna noh ia u James kum u nongjop.
Ka sorkar MDA-2, ka don 51 ngut ki MLA kynthup ka NPP, UDP, BJP, HSPDP bad MLA shimet katba ka liangpyrshah ka don tang 9 ngut ba kynthup ia ka TMC, bad VPP ha ka ïing dorbar kaba 60 ngut.