Shillong: U MLA ka Sohra u bah Gavin Miguel Mylliem ula ong ba ka sorkar MDA-2 ka la pynkloi sted ia ka jingkular jongka ban pynkhuid ia bynta ne ka instalment kaba dei ban siew sha baroh ki nongtrei ka karkhana Mawmluh Cherra Cement Limited (MCCL).
U bah Gavin ula ong ba ha ka jingshisha, ka sorkar ka la kular ban pyndep ia ka jingsiew ia ka bynta kaba dei ban siew katkum ka jingiateh, ka long lai sien ki snem mang pisa hynrei ka la dep ban siew la ar sien tang ha kawei ka sien mang pisa jong u snem bad mynta dang sah sa tang shien ban pynkhuid.
Ula ong ba ka jinglut baroh ka lah ban long kumba T. 27 klur eiei ban siew khadduh kum ka jingiakhublei kti hadien ba ka sorkar ka la khang noh ia ka MCCL.
Ha kajuh ka por, halor ka jaka kaba ieng ka MCCL, u bah Gavin ula ong ba ka la don ka jingphah khubor na ka Hima Sohra ba ka lah ban ai wai ia katei ka jaka sha ka sorkar na ka bynta ban pynkylla sha ka spah kam jngohkai hynrei kane ka kam, ka la shu sah noh kumto hadien ba la khlad noh u Syiem Freeman Singh Syiem.
Katkum ka jingong u bah Gavin kam pat don kano kano ka jingiatai ba ka sorkar kan shimti ia katei ka jaka ne ban iasoi MoU haduh mynta.
La siew ar sien ka ‘jingkhublei kti khadduh’ sha ki nongtrei MCCL | dang shu iaphah khubor, ym pat rai ia ka jaka: Gavin
