Shillong: U Acting Syiem ba thymmai ka Hima Mylliem u Alban Fedrick Syiem ula shimti mynta ka sngi ia ka khet Syiem ka Hima ha ka jingsakhi lang ki myntri bad kiba khraw batri.
Ka KHADC ka la thung ia u hadien ba ka la weng noh ia u Syiem Paiem Ainam Manik Syiem.
Haba kren sha ki lad pathai khubor, u Paiem Alban ula ong ba ka jingwan shimti jongu ia ka khet, ka long ban wanrah ia ka synshar khadar kaba khuid ha ka Hima.
Ula ong ba ka KHADC ka la ibit ia u ban shung kum u Acting Syiem bad ula ong ba kan don ka jingiatreilang bad ki myntri ban pyniaid ia ka synshar khadar ha ka Hima.
Ha kajuh ka por, ula pynshai ba ka bhah ba ka Hima ka hap ban siew sha ka KHADC kam dei haduh T. 3 hajar tam kumba la paw ha ki lad pathai khubor hynrei ka dei 3 klur, 24 lak, 85 hajar, 20 tyngka naduh 2018.
Ula ong ba ka jingpynshitom ia u syiem barim paiem Ainam Manik Syiem ka shong ha ka KHADC bad ka Executive Committee ba thymmai jongka Hima kam don bynta ha kata ka jingbym siew ia ka bhah sha KHADC.
Lah ban kdew ba ka KHADC ka la thung Acting Syiem ia u Alban Fedrick Syiem halor ka jingkynnoh ba u Syiem barim u Paiem Ainam Manik Syiem ula pyndonkam bakla ia ka pisa ka Hima ha kaba ka Hima kam siew ia ka bhah kaba 10 percent ka jingmih na ki iew bad ka 1\8 bynta na ka jingmih ka Hima sha ka KHADC ha kine ki snem kaba la kot sha ka 3 hajar klur tam.
Yn pynkhuid ia ka synshar ha ka hima, ong acting syiem ka hima mylliem|T.3.24 klur, ym dei T.3 hajar klur
