Shillong: Ka Khasi Jaintia Presbyterian Synod Pdeng ka la pynrem jur ïa ka jingshah pynïap dusmon ki lai ngut ki pastor ha Manipur dang shen.
U Pastor H.K Nongbsap uba dei u moderator jong ka KJP Synod Pdeng, haba pynpaw ia ka jingsngewsih kthang halor kane, u la ong ba ka Synod ka pynrem jur ia kane ka shah hiar thma ki nongsharai Balang.
Lai ngut ki pastor kynthup u Rev. Bumthang Sitlu, ka Manipur Baptist Convention, u Pastor P.K. Kaung Lun bad u Pastor Poko Len kila shah synreit kuli ha Manipur dang ha kane ka taiew.
U Pastor Nongbsap u la ong ba ym lah ban mutdur ba ki nongïalam niam kiba trei na ka bynta ka jingïasuk bad ka jingïatylli kin shah pynïap ha kum kane ka rukom.
Ha kawei ka liang, ka BJP Meghalaya hapoh ka jingialam u President u Rikman G Momin, ka la pyllong ia ka jingduwai kyrpang ia ki mynsiem ba la shah dkhat jubor.
Ia ka jingduwai la ialam da u Vice President ka BJP Meghalaya, bah Khrawboklang Basaiawmoit, katba u nongaiktien ka party bah Mariahom Kharkrang, ula kyntu ia ki paidbah ka Meghalaya ban ai ka por jongki shimit ban duwai ia ki paidbah ka jylla Manipur kiba mad ia ka jingsyllang na ki kam thombor. Ula kyntu ba dei ban pynneh ia ka jingsuk ha kano kano ka dur ruh.
Pynrem jur ka KJP Synod Pdeng | Duwai ka BJP ba shah pyniap dusmon ki nongsharai Balang
