Shillong: U Myntri Rangbah Conrad K. Sangma ha ka sngi Nyngkong u la pyllait paidbah ïa ki kali thymmai ki Pulit ha Police Officers’ Mess, Golflink, Shillong, kum ka sienjam kaba kongsan ban pynkhlaiñ ïa ka leit ka wan, ka kit ka rong ki Pulit, ka behkam behjam, khnang ba ka tnad pulit kan lah ban ai shuh shuh ia ka jingshakri kaba bha sha ki paidbah.
Ka Director General of Police I Nongrang kala iadonlang ha kane ka prokram ha ryngkat ki Heh Ophisar ka Sorkar, ki Heh Pulit bad ki Pulit ka tnad Meghalaya Police.
Ha kane ka prokram, la pyntip ba haduh 95 tylli ki kali la dep ban thied na ka bynta ka Tnad Pulit, ia kaba 79 tylli ki kali la thied lyngba ka song pisa bala ai da ka Sorkar India hapoh ka Central Assistance to State Police Scheme.
Kine ki kali ba dang shu thied thymmai ki kynthup ia 20 tylli ki Maruti Jimmy, 19 tylli ki Tata truck, 5 tylli ki Mahindra Mini Truck, 19 tylli ki bus ba don 20 jaka shong, 10 tylli ki bus ba don jaka shong 24 ngut, 8 tylli ki bus ba don jaka shong 36 ngut bad 8 tylli ki Tata Yodha na ka bynta ka tnad CID.
Ka jinglut na ka bynta 95 tylli ki kali ka la kot sha ka T.30 klur.
Ha kaba kren ha ka jingialang, u Myntri Rangbah Conrad K. Sangma u la ban jur ïa ka jingdonkam jong ka suk ka sain ha ka synshar khadar bad ban jur ia ka jingkut jingmut jong ka Sorkar ban pynkhlain ia ki bor Pulit.
T.30 klur ia 95 tylli ki kali:ki bus, ki trok, ki jimmy, yodha aiti ka sorkar ha ki pulit ban sted beh kam
