Shillong: Ki nonghikai ka Meghalaya SSA School Association ki la sngew kmen bad ki sngew hun ba ka umsyep ba kila iakhun, ka la siew kylliang ha kaba ka sorkar khadduh khadwai ka la pynkiew ia ka tulop bad pynskhem ia ka kam jongki.
Shi bynta ban pynbna paidbah halor kane, ka sorkar ka la pyllong ia ka prokram ban pyllait paidbah ia ka tulop thymmai ia ki nonghikai SSA bad ki 4th teacher ha madan Student, Jaiaw Shillong ha ka 1 tarik Jymmang, ha kaba u myntri rangbah ka jylla u Conrad K Sangma, u Symbud Myntri Rangbah u bah Prestone Tynsong, u myntri ka tnad pule puthi bah Lahkmen Rymbui, nalor kiwei kila wan ban pyndonburom ia kane ka sngi.
Ka madan Student Jaiaw, ka la shlei smam da ki nonghikai skul SSA kiba wan na kylleng ki jaka jong ka jylla sha kane ka prokram kaba la pynbeit ka sorkar lyngba ka tnad pule puthi.
Haba iakren bad ki katto katne ki nonghikai skul SSA kila pynpaw ia ka jingkmen ba ka sorkar ka la sngap ia ka jingdawa jongki hadien bun snem.
Ym tang ba ka pynkiew ia ka tulop thymmai hynrei ka la ai ruh ka jingpynskhem ia ka kam jongki.
La ioh ban iakren ia ki nonghikai kiba hap ha ka Meghalaya SSA School Association kiba la pynpaw ba ka jingai khublei ia ka sorkar MDA-2 kaba la shim ia ka sienjam kaba la wanrah ka jingkmen ia ki nonghikai katkum ka hok jongki.
Ha kajuh ka por, ki la kyntu ia ki para nonghikai ba kin kitkhia ia ka kam kumba ka sorkar ruh ka la shimkhia ban pynbeit ia ki jingeh jong ki nonghikai bad lada don kiba ju ai wai pateng ha kiwei ia ka kam hikai, ki dei ban sangeh noh mardor.
Ki don kumba 15041 ngut ki nonghikai SSA kynthup bad ki Fourth teacher ha ka jylla baroh kawei ki ban ioh pdiang ia ka tulip thymmai naduh mynta u bnai Iaiong.
Lada don ki nonghikai skul SSA ba ai bylla pateng ha kiwei sangeh noh| jah thait ki nonghikai ba ioh tulop thymmai
