Shillong: Ka jingai jingkhein dalade na ka bynta ka khana samari 2027 kan sdang ha kylleng ka jylla Meghalaya naduh ka 1 tarik u Jymmang, 2026, kaba long u mawmer ba kongsan ha ka khana samari kaba nyngkong eh ha ka ri India kaba pyndonkam da ka lad digital. Ia kane la pynbna ha ka jingialang bad ki lad pathai khubor ba la pynlong da ka Press Information Bureau (PIB), Shillong ha ryngkat ka jingiatreilang bad ka Directorate of Census Operations, Meghalaya, kaba la long mynta ka sngi ha Shillong Press Club.
Haba ai jngkren sha ki lad pathai khubor, u Director ka Tnad Census Operations, Meghalaya, Sorkar India u Biswajit Pegu u la ong ba ka Khana Samari 2027 kan long ka kam kaba kongsan, ha kaba kadei ka Khana Samri kaba 16 bad kaba 8 naduh ba la ïoh ïa ka jinglaitluid. U la ban jur ba ha ka sien kaba nyngkong, ïa ka kam ba iadei bad ka khana samari baroh kawei- naduh ka jingkheiñ briew haduh ka jingbishar bniah ïa ki jingtip – yn pynlong lyngba ka lad digital da kaba pyndonkam ïa ki mobile application bad ka rynsan Census Management and Monitoring System (CMMS).
U Pegu u la pyntip ba ki nongshong shnong kin don ka lad ban ai jingkheiñ hi dalade lyngba ka rynsan online naduh ka 1 tarik u Jymmang haduh ka 15 tarik u Jymmang, 2026. Kane ka ailad ïa ki briew ban pyndap ïa ki jingtip ba bniah shaphang ka longïing jong ki, ïa kaba hadien yn sa pynshisha da ki nongshim jingkhein ha ka por ba ki leit sha man la ki tyngkong ki ïing. U la ban jur ba kane ka sienjam kan kyntiew ia ka jinglong kaba shai, kaba thikna, bad ka jingiashim bynta jong ki paidbah ha ka kam ba iadei bad ka khana samari.
Kiwei pat ki heh ophisar kiba la don lang ha kane ka jingialang bad ki lad pathai khubor ki kynthup ia u Subhasish Chatterjee, Joint Director; u B. Basumatary, Deputy Director; Bah Aibor Sanglyne, Deputy Director na ka Tnad Census Operations. Ia ka jingialang bad ki lad pathai khubor la pyniaid da u Assistant Director ka PIB Shillong u Gopajit Das.
Ia ka khana samari 2027 yn pynlong ha ki ar bynta. Ka bynta I ka kynthup ia ka jingai jingtip dalade bad ka House Listing Operations (HLO). Hadien ka samoi ai jingtip dalade, yn pynlong ia ka HLO naduh ka 16 tarik u Jymmang haduh ka 14 tarik u Jylliew, 2026, ha kaba ki nongshim jingtip kin lum ia ki jingtip shaphang ki jinglong jingman jong ka iing, ki jingdon jingem, bad ki jingdonkam ba kongsan lyngba ka jingkylli ba la buh ryntih kaba kynthup ia 33 tylli ki jingkylli. Ka bynta kaba II, ka jingkhein ia ki nongshong shnong, kan long ha u bnai Rymphang 2027, bad ka tarik ba la buh ha ka 1 tarik u Lber, 2027.
Haba kren shaphang ka bynta kaba iadei bad ka ain, u Pegu u la ong ba ia ka khana samari la pynlong hapoh ki kyndon jong ka Census Act, 1948 bad Census Rules, 1990. U la ong ba ka jingpynkylla digital kan pynthikna ia ka jingbeit jong ki jingtip lyngba ki jingkylli ba la buh lypa ha ki mobile application bad ka jingpyntreikam kham kloi, kaba pie lad ia ka jingpynmih resol ha ka por kaba biang.
Haba batai bniah ia ka rukom treikam, u la ong ba ia ka jinglum jingtip yn pynlong lyngba ki mobile apps ba kyrpang ba la pyndonkam da ki nonglum jingtip bad ki nongpeit ha ki smartphone. Ka rynsan CMMS kan pyniaid ia baroh ki kam kynthup ia ka jingai jinghikai, ka jingpeit bniah, bad ka jingthaw ia ki House Listing Block ba la don ka geo-code lyngba ka HLB Creator (HLBC). Ia ki jingtip ba la ai hi dalade yn pynshisha ha ka por ba leit sha ki iing shwa ban aiti khatduh.
Halor ka jingïada ïa ki jingtip, u Pegu u la pynthikna ba la pyntreikam ïa ki lad jingïada kiba khlaiñ ban pynneh ïa ka jingiada ia ki jingtip. Yn nym pynpaw ia ki jingtip jong ki briew bad jong ki longiing, bad yn pyllait tang ia ki jingtip ba la lum lang ha ki kyrdan pyniaid kam bapher bapher na ka bynta ban thaw ia ki polisi bad ka jingpynkhreh kam na ka bynta ka roi ka par. Ia ki number mobile ba la lum yn pyndonkam tang na ka bynta ka jingiakren bad ka kam pynshisha.
U la pyntip shuh shuh ba kumba 9,000 ngut ki nonglum jingtip bad ki nongpeit yn buh ha kylleng ka jylla, ryngkat bad ka rukom peit bniah kaba khlaiñ bha ba bun bynta ban pynthikna ïa ka jinglong thikna jong ki jingtip. Ka Khana samari kan kynthup ia baroh ki longing, katba ki katto katne ki thup kum ki bar jylla bad ki nongtrei sorkar na kiwei kiwei ki ri yn nym kynthup ha ka bynta jong ka HLO.
Haba ai jingkren ha kane ka sngi, u Subhasish Chatterjee, Joint Director, Tnad Census Operations, Meghalaya, u la ban jur ba la plie paidbah ïa ka national toll-free helpline -1855- ha kylleng ka ri India kum ka jingpynkhreh ïa ka Khana samari 2027. U la pyntip ba la thaw ïa ka helpline ban ïarap ïa ki nongshong shnong ha ki jingkylli kiba ïadei bad ka khana samari, kynthup ïa ki kam lum jingtip shaphang ki ïing bad ka jingkheiñ ïa ki nongshong shnong. Kan ai ruh ia ki jingbthah halor ki rukom treikam, ban weng ia ki jingeh bad ban pynthikna ba ki briew kin ioh ia ki jingtip kiba thikna bad ha ka por kaba biang.
Ia ki pud jong ka kam synshar jong ka Meghalaya la khang noh naduh ka 31 tarik u Nohprah 2025, na ka bynta ka Khana Samari. Ia kane ka kan yn pynlong hapoh ka jingpeit jong ki Deputy Commissioner kum ki Principal Census Officer, la kyrshan da ki Charge Officer, ki Supervisor bad ki Enumerator.
Ki heh sorkar, lyngba ki lad pathai khubor, ki la kyntu ia ki paidbah ban iashim bynta shitrhem ha ka rukom ai jingtip dalade bad ban pyniar ia ka jingiatreilang kaba pura sha ki nonglum jingtip ban pynthikna ia ki jingtip kiba thikna bad kiba lah ban shaniah na ka bynta ka roi ka par kaba kynthup lang ia baroh bad ka jingsynshar kaba pynshong nongrim ha ki sakhi ha ka jylla Meghalaya. Ki la ban jur ba kaba kongsan kumjuh ka long ka bynta jong ka jingpynsngewthuh paidbah, da kaba ong ba ki nongthoh khubor ki don ka bynta kaba kongsan ha kaba pynsaphriang ïa ki jingtip kiba thikna, ban pynduh ïa ki jingsngewthuh bakla, bad ban iarap ïa ki nongshong shnong ban ïashim bynta da ka jingshaniah bad jingshai ha ka Khana Samari 2027.
Sdang ka khanasmari- ban khein khlieh briew bad tnum ïing nalor ki jingdon jingem
