Shillong: Ka seng sain pyrthei Voice of the People Party (VPP) kala pynpaw ia ka jingsngew khia jur halor ka jingmih khubor ba ka BJP ka la pyrshang ban wanrah kam pynroi ha krem mawjymbuin ha Mawsynram hapoh ka skhim PRASHAD bad Swadesh Darshan 2.0, kaba lah ban ialam ban pyllong sha ka jingiadei bad ka niam.
Ha ka kyrwoh kaba la pyllait mynta ka sngi, u nongaiktien ka VPP u Dr. Airpeace Well Rani ula ong ba ka VPP ka kwah ban kren shai ba u Mawjymbuin ha Mawsynram u dei u jingthaw ka mariang bad khring ia kiba wankai bad u dei ban sah kumto. Kano kano ka jingpyrshang ban batai, ban pynbha ia katei ka krem kum ka jaka ialeh niam, ka dei ka bym lah ban pdiang.
U la ong ba ka jingpyrshang ban pyniahap ia ka krem mawjymbuin bad ka kynhun niam ka la ialam sha ka jingiatainai hapdeng ki paidbah bad ka la poi shaduh ka kashari ha ki snem ba la leit. Ka jingmih na kane ka long ba la kren shai ba ym dei ban pynkylla ia katei ka jaka ne pyllong kum ka jaka iaid pilgrim ha kano kano ka dur.
Ka VPP ka la kyntu ia ki bor bad ki paidbah ban kiar na kaba pynshit ia kane da ka jingkitkhlieh bad ka la ong ruh ba dei ban burom ia ka jingsngew jong ki paidbah ban kiar na ka jingmih ka kynrum kynram kaba lah ban ialam pynban sha ka jingiaphiah bad jingiapher. Ka VPP ka la kren shai ba ym dei ban pyniasoh ia ka krem mawjymbuin sha kano kano ka niam ne ka jingngeit bad dei ban sah kumto kumba la buh ka mariang ban long ka jaka jngohkai.
Lah ban kdew ba hynnin ka sngi u MLA ka BJP bah AL Hek ula ong ba ula iakren bad ki u rangbah shnong ka shnong Mawsynram ha kaba ka sorkar India ka kwah ban pynbha ia ka krem mawjymbuin hynrei ka jingpyniaid kan long beit ha ka shnong ne ka kynhun kaba peit bad kam dei ba thmu da kumno kumno. U la ong ba u rangbah shnong ula pyntip ba un iakren shwa ha ka executive committee jong ka dorbar halor kane.
Wat pyniasoh ia u Mawjymbuin sha kano kano ka niam ne jingngeit | ai un neh kum ka jaka jngohkai :VPP
