Shillong21,Jymmang: Ka kynhun jong ka Meghalaya Blind Football Team ka la khur ia ka namjop ha ka kyrdan kaba lai ha ka jingiakhun ia ka league jong ka National Blind Football Tournament held kaba la long ha Jamshedpur.
Katkum ka jingioh iakren bad ki nongialam jong ka Meghalaya Blind Football Team, ki la pyntip ba ki la iakhun nyngkong ha ka pool league kaba don lai group A, B bad C ha kaba ka Meghalaya ka hap ha ka group C ryngkat ka Telangana bad ka Madhya Pradesh.
Ha ka pool league kaba nyngkong jong ka group C kaba iakhun hapdeng ka Meghalaya bad Telangana, ka kynhun jong ka Meghalaya ka la jop ia ka Telangana da shi kol la nod bad ka la iakhaid pat bad ka Madhya Pradesh kaba pynlong ia ka Meghalaya ban don ha ka kyrdan kaba nyngkong jong ka Group C.
Ha ka jingiakhun jong ka final league pyrshah ia ka Maharashtra, ka la shah rem noh da shi kol, bad ha ka final league kaba ar, ka la iakhaid noh bad ka Uttarakhand.
Ha ka jingiakhun jong ka Uttarakhand bad ka Maharashtra, lada jia ba ka Uttrakhand ka rem, ka Meghalaya kan wan ha ka kyrdan kaba ar, hynrei sniewbok ba ka Uttrakhand ka jop ia ka Maharastra, bad ka la pynlong ia ka Meghalaya Blind Football Team ban ioh ia ka kyrdan kaba lai na ki khyndai tylli ki jylla.
Hadien ka jingjop jong ki, ka Meghalaya Blind Football Team ka la ioh ban rah ia ki trophy ha ryngkat bad ka song pisa kaba rit.
Kum ban shu pynkynmaw, ki thei ialehkai football ki la mih na nongbah Shillong khlem kano kano ka jingiarap, hynrei tang da ka scholarship kaba ki ioh, ki ia pyllang ban leit ban mihkhmat ia ka jylla sha kane ka tournament, bad hadien ka jingioh jingtip, na ka liang ka HYC Sengkmie ka la leit ban kner jingiarap ia kane ka kynhun ha ka sngi shuwa ba kin mih na ka nongbah ha ka taiew baladep.
Ha kaba iadei bad kane, na ka liang ki thei ialehkai, ki la buh ka jingkyrpad ia ka sorkar khamtam ia ka tnad badei peit ia ki kam ialehkai ha ka jylla, ban phaikhmat lem sha ki kiba don jingduna ha ka bor iohi, khnang ba kin lah ban kiew ha ka kam lehkai football bad mynta ba ki dang pynkhreh ia ka World Cup kaban long ha u bnai August lada ki shah jied ban mihkhmat ia ka Ri India.
