Shillong: U myntri ka tnad pule puthi ka jylla u bah Lahkmen Rymbui ula pyntip ba ka jylla Meghalaya ka donkam sa tang 38 hajar ngut eiei ki briew ban hikai ban nang ban thoh ban pule, ban kot 100 percent kiba la nang ban thoh ban pule ka jylla.
Haduh mynta ka jylla ka la kot sha ka 94 percent kiba la nang ban thoh ban pule bad ka donkam ban kot sa shi percent, kata sha ka 95 percent ban pynbna kum ka jylla ka bym don shuh kiba biej ki bym nang ban thoh ban pule.
U myntri ula ong ba khnang ban poi sha kane ka thong, ka sorkar kan pyntreikam ia ka jingialap paidbah kaba jur naduh ka 24 tarik mynta u bnai Iaiong.
Haba kren sha ki lad pathai khubor haka sngi Palei, u bah Lahkmen ula pyntip ba ka sorkar kan pyntreikam ia ka Massive Campaign ne ka jingialap kaba jur ban kot noh sha ka 95 percent kiba la nang ban thoh ban pule.
Ha kajuh ka por, la pyntip ba ka tulop thymmai ia ki nonghikai bym dei sorkar, kan treikam naduh mynta u bnai Iaiong.
Ka jingialang bishar bniah kaba la pyllong u myntri, ka la iakren ruh ia ka jingpynbha ia ki college ha ki jaka bapher bapher ha ka jylla, nalor ka jingthung nonghikai, nalor kiwei pat.
Sa tang 38 hajar la lut kiba biej ha pule puthi ha Meghalaya
