Shillong: U phareng ka ri United States of America (USA) u Sahep Patrick Rogers ula khlad kyndit ha ka 21 tarik Lber ba la dep bad yn pynkhuid ia ka met jong u lashai, ka 3 tarik Iaiong, 2026 da kaba thang ha Pynursla.
Ia ka jingpynkhuid ia ka met jong u, yn leh hadien ba la dep ban pyndep ia ki jingdonkam baroh ryngkat kiba haiing hasem bad ka Embassy ka USA kaba don ha India.
Haba pyntip ia kane, u bah Morningstar Khongthaw uwei na ki samla ba ju kyntiew ia ki jingkieng jri, ula iathuh ba u Patrick u dei u briew uba lah leh bun ki kam bha ïa ka jylla Meghalaya bad ïa ki briew jongka, khamtam ha kaba ïadei bad ki jingkieng jri. U la wan nyngkong sha kine ki shnong bad ki khlaw ka ri Khasi, u la ïaid ha ki lynti khlaw ki them ka Ri war bad u la iarap bad pyni ïa ka jingitynnad jong ki jingkieng jri sha ka pyrthei baroh kawei.
Da ka jingtrei shitom jong u, bun ki briew nabar ri ki la tip bad sngewthuh ïa kine ki jingkieng jri bad ïa ka kolshor ka jaitbynriew. U la ïalam bad ai mynsiem bad pynshlur ïa kiba bun, khamtam ki khun samla.
Wat ha ki sngi ba khatduh jong u, u dang bteng ban wad, ban pule bad ban wad ki lad ki lynti ban kyntiew ïa ki ki jingkieng jri. U bah Morning ula pynpaw ia ka jingduh kaba khraw ia une u paralok ba bha bad uba ieit ïa ka mariang bad ïa ka jylla Meghalaya. U la phah ïa ka jingïasngewlem sha ka ïing ka sem jong u.
Ula pyntip ba ia ka met jong u Patrick Rogers yn thang ha ka 03/04/26 ha u Lum jingthang-lum jingtep ka Khun kur Longtrai Lai Kynthei, Raid Shabong.
U Patrick ula khlad kynsan ha ka 21 tarik ha Shnongpdeng bad katkum ka jingtip, ka dei na ka jingpang klongsnam.
Khlad u phareng na Aamerica ha Shnongpdeng, yn thang ha Pynursla, u dei u nongpynpaw nam ia ki jingkieng jri
