Shillong: Na ka bynta ban pynioh ia ka internet kaba sted wut wut bad shait shait wat shaduh ki jak aba kyndong tam ki jaka nongkyndong, ka sorkar Meghalaya ka la iasoi ia ka soskular bad ka Starlink India mynta ka sngi.
La sakhi lang ia kane ka jingiasoi soskular Letter of Intent (LoI) da u myntri rangbah u Conrad K. Sangma, u myntri sorkar bah Lahkmen Rymbui lyngba ka video conference.
Na Meghalaya la soi u Sampath Kumar, Additional Chief Secretary katba na ka Starlink la mihkhmat ka Gwynne Shotwell, President & COO, SpaceX bad kiwei.
U Conrad ula ong ba ka jingthmu ba kongsan kane ka jingiateh soskular ka long ban pynpoi ia ka internet kaba sted sha ki jaka nongkyndong lyngba u metbneng ne satellite khnang ban pynsted bad pynsuk ia ka jingtreikam namar ba ha kane ka juk mynta, la bun ki kam la trei lyngba ka kor internet ha ki mobile phone.
Lyngba kane ka kor internet kaba khlain bad sted, ki khynnah skul ha nongkyndong kin suk ban ioh jingtip bad ki nongrep sha ki lyngkha rep ruh ki lah ban pyndep haba ki don ka mobile phone.
Ka internet ba sted wut wak sha jaka ba kyndong tam, iasoi soskular ka Meghalaya bad ka Starlink India
