Shillong: U myntri ka tnad sam marbam ka jylla u bah Methodios Dkhar ula ong ba ka lyer shet ne LPG kam da pahuh kumba long ha ki por mynshwa, shwa ban don ka thma Iran pyrshah ia ka Israel, USA hynrei ka biang ia ka jingdonkam ki paidbah.
Haba kren mynta ka sngi, u myntri ula ong ba la ioh jingujor ha kine ki sngi ba ka la don ka jingkyrduh lyer shet kiba pyndonkam ha iing kam kyrduh bad ki paidbah kim dei ban long kap kap ban tieng.
U myntri ula pyntip ruh ba la don ka jingujor ba ki nongsam LPG kila die blak haduh 2-3 hajar ha kine ki sngi hynrei ka sorkar kala don ka Vigilant Committee kaba khlieh u Chief Secretary ha ka jylla bad ki Deputy Commissioner ha ki District bad kito kiba lap ia kiba die blak, ki dei ban ujor bran bran khnang ban shim kam pyrshah ia ki.
Hynrei ha kaba iadei bad ka LPG ba pyndonkam ha ki dukan, ki hotel, restaurant, ka la kham duna namar ba ka sorkar India ka la pynduna 20 percent na kaba ju ai mynshwa. U bah Methodios ula ong ba ka sorkar jylla ka la thoh sha u myntri ka tnad Ministry of Petroleum and Natural Gas of India ka sorkar India u Hardeep Singh Puri ban ym pynduna ia ka LPG namar ba ka dei ka jylla kaba la kiew bha ha ka kam jngohkai. Halor kane, ka sorkar India ka la kham pynbun ka jingphah ia ka LPG ha kine ki sngi watla kam dei pat ba la pahuh.
Halor ka petrol, diesel, u myntri u la ong ba ka dang biang ha kane ka jylla watla ym pat lah ban tip kan kyrduh ne em lada bteng ka thma Iran pyrshah ia ka Israel, USA.
Ula ong ba haduh mynta ym pat ioh eiei ba ka petrol, diesel kan duna ne em hynrei lada ka thma ka dang bteng, ym lah ban ong.
Haba kyntu ia ki paidbah ban ym syier thot thot, u myntri ula ong ba ki paidbah kim dei ban tieng ban smiej ban kyrduh petrol, diesel namar ba lada don eiei, ka sorkar kan sa pynbna sha ki paidbah. Hynrei ula kyntu ia ki paidbah ban kiar na leh pahuh mata madei hynrei ki dei ban pyndonkam da kaba adkar.
Ki LPG ïing kam pahuh hynrei ka shu biang, ym dei ban kap kap, ong u Myntri
