Shillong: U nongiasaid uba pawnam ka jylla u bah Vivan GK Kynta ula ong ba ka jingurlong ka jingdawa ban pynkylla ia ka AD Rules 8 bad 128 ne ka Assam and Meghalaya Autonomous Districts (Constitution of District Councils) Rules, 1951.
Haba kren mynta ka sngi, u bah Vivan ula ong ba ka jingiakhih ki paidbah Garo ryngkat ka jingkyrshan lang ki kynhun na kane ka Khasi-Jaintia, ka la pynjem khnap ia ka sorkar ban pyndem watla ka la ju pyneh ba ki bym dei riewlum ne non-tribal ki lah ban iashim bynta ha ka elekshon ka Garo Hills Autonomous District Council (GHADC).
Haba batai halor ka Sixth Schedule, u bah Vivan u la ong ba ka jingthmu ba kongsan ka Sixth Schedule ka long na ka bynta ki riewlum bad ka bor laitluid jongki. U la ong ba AD Rules ka Assam – Meghalaya 1951 ka dei ka bynta jong ka met Sixth Schedule.
Katkum ka jingong bah Vivan, hadien ba la mynjur u Lat, dei ban pynmih ia ka jingpynbna ha ka Meghalaya Gazette katkum ka Para XI ka Sixth Schedule khnang ba kan long aiñ pura.
Halor ka jingsahkut ka Village Administration Bill ka KHADC ha kito ki por, u bah Vivan u la ong ba kane ka Bill ka la sahkut namar ba ka don ka jingleh politik ka sorkar jylla ha kato ka por.
U bah Vivan ula ai ka jingiaroh ia u CEM barim ka GHADC u Albinush R Marak uba la pynmih ia ka hukum ba tang kiba don syrnod Schedule Tribe, kiba lah ban ialeh ia ka elekshon sha MDC sha GHADC, kaba la wanrah ka jingjop mynta.
Ula maham pat ia ka Khasi Hills Autonomous District Council ( KHADC bad ka Jaintia Hills Autonomous District Council (JHADC) ba kim dei buh kyntien tang kiba don ka Schedule Tribe certificate namar ba kan plie lynti ia kiwei ki Schedule Tribe kiba don ha jylla ki lah ban ialeh iaka elekshon hynrei dei ban bsuh beit tang da ka kyntien Schedule Tribe Khasi, Jaintia bad Garo khnang ban khang lad ia kiwei pat ki Schedule Tribe.
U la kyntu ia ka KHADC bad JHADC ba kin khot dorbar kyrpang noh ban pynkylla ia ka AD Rules.
Jem khnap ka sorkar ba iatylli ki paidbah halor ka jingpynkylla ia ka AD Rules, ong u stad aiñ
