Shillong: Ha ka sienjam ban pynkiew ia kam shna phlim ha ka jylla, ka sorkar Meghalaya ka la pynbna ba kan pyllong ia ka Shillong Film Festival 2026 kaba lai sngi, naduh ka 25 haduh 27 tarik Lber 2026 ha State Convention Centre, Shillong.
Ia kane la pynbna u myntri ka tnad sam jingtip ka jylla u bah Lahkmen Rymbui uba la pynbna ba kane ka rynsan kan plie lad ia ki samla ka jylla kiba don sap ha kane ka kam shna phlim bad shim bynta kum ki tyngshop ki puron.
U bah Lahkmen u la ong ba ka jylla Meghalaya ka dei kaba la kyrkhu da ka mariang kaba itynnad, ka riti dustur, ka rukom im ki briew, bad ka kam jngohkai, bad lyngba ka jingwanrah ia kane ka tamasa ki phlim, kan nang kyntiew ia ka kam jngohkai bad plie lad ruh ia ki briew ha kane ka bynta.
Ha kine ki lai sngi, yn don ka jinghikai, ka jingiathir, bad ka jingpyni ia ki phlim kiba na kane ka jylla, nabar jylla bad kumjuh kiba nabar ri. Ki nongshna phlim kumjuh ki tyngshop ki puron kiba na kane ka jylla bad nabar ruh, kin wan ban iashim bynta ha kane ka tamasa.
Yn wan iashim bynta ki puron ki tyngshop nabar jylla bad nabar ri ha ka Shillong Film Festival
