Shillong: Ki runar nongrah tuh ia ki ar shaka na Shillong bad kiwei ki jaka, kila khla ba kila leit aiti ia ki ar shaka ba kila tuh sha uwei u briew sha Lad Rymbai, kaba hap ha East Jaintia Hills.
Ha ka kyrwoh kaba la pyllait mynta ka sngi, u SP ka East Khasi Hills u bah Vivek Syiem ula ong ba dang shen ki pulit ka nongbah kila ioh kem ia uwei u nongtuh ar shaka na Golflink uba la tip kyrteng kum u Shabamutlang Syiemlieh 23 snem bad hadien kane, ki pulit ka Jowai kila ioh kem sa saw ngut kiwei pat kynthup ia u Vencenstar Tongwah, 23 na Nongmensong, Lumshyiap, u Kitborlang Mawlong 21 snem, Royalroy Lyngdoh 23 kiba na Mawsiatkhnam bad u Ayan Kharthangmaw 21 snem uba dei na Mawhati.
Kine kiba shah kem ki dei kiba rejister ia ki kam tuh kam thiem jongki ha Laitumkhrah PS bad Sadar PS.
Hadien ka jingphla jongki bad u SP ula phah ia ki pulit na Pasteur Beat House, Shillong sha Jowai ban tohkit bniah bad ha ka jingtohkit ki pulit, kila phla ba kila rong tuh ia ka Yahama15 na Umroi, kawei pat na Caroline, Laitumkhrah bad kawei ka scoty na Golflink bad ia ki ar shaka kiba kila tuh, kila aiti ha uwei u briew sha Lad Rymbai.
Mar mar, ki pulit kila hiar sha katei ka jaka kaba khot Lad Rymbai, Dongwah bad na kane ka jaka ki pulit kila ioh kurup ia ka Yamaha15 ML05AB 2991, Yamaha15 ML05 AE 1478, bad 2 tylli ki engine Yamaha15 kiba la dep khura.
Na katei ka jaka, ki pulit kila ioh kurup ruh ia ki tiar jong ki ar shaka kiba la khura bad thep ha ki byrni kiba la thmu ban leit die sha ki nongthied. Ki pulit ki dang tohkit ban ban leit kem sa ia kiwei kiwei kiba donkti.
Poi ki ar shaka ba shah tuh na Umroi, Shillong sha Lad Rymbai, ioh kurup 5 tylli, shah kem 5 ngut
