Shillong: Ka seng Hynniewtrep Youth Council (HYC) Mawlai circle ka la beh noh ia ki bar jylla kiba wan bylla khlem ki kot ki sla kiba biang. Ia kane ka sienjam, ka seng ka la ai kyrteng kum ka Sier Lapalang Operation (SLO).
Ha ka jingleit talasi mynta ka sngi, ka seng ka la phah leit noh ia kine ki bar jylla kumba 15 ngut kiba khlem lah ban pyni ia ki kot ki sla kiba biang kiba trei bylla ha ha NEHU campus.
U bah S.Marwein u Organising Secretary u Organising secretary ka seng u la ong ba kane ka dei ka jingsdang jong ka SLO mynta u snem bad kan nang pynjur ban khynra ia ki bar jylla kiba wan bylla khlem kot khlem sla. U la ong ruh ia ki Contractor ba lada ki buh nongbylla sngewbha shim shwa da ki Khasi, namar bun ki Khasi kim ioh bylla shuh mynta ki por, namar ki Contractor ki la wanrah nongtrei da ki bar jylla da kaba ai daw ba kham tad dor.
Ha kawei ka jingkhynra, ka HYC Mawphlang Area Unit ha ka jinglam jong u Bah Bijoy Nonglang u President ka la beh noh ia kumba 17 ngut ki bar jylla kiba trei bylla ha ka ki jaka trei jong ka PHE Department bad ha ka skul JNV Mawphlang.
Ka seng ka la ong ba kine ki nongtrei bar jylla kim don ia ki kot ki sla kiba biang bad kumta ka seng ka la phah leit phai iing noh ia ki.
Kontraktor ai kam shwa ia ki Khasi |phah leit ïing noh ka HYC ia ki bar jylla na Mawlai, Mawphlang
