Shillong: Ka sorkar jylla Meghalaya kala rai ban pynsangeh noh shwa ia ka elekshon sha GHADC.
Haba pynbna ia kane mynta ka sngi, u myntri rangbah ka jylla u Conrad K Sangma ula ong ba ka sorkar jylla kala rai ban pynsangeh noh shwa ia ka elekshon na ka daw ba ka jinglong jingman kam pat ailad ban iaid shakhmat ia ka elekshon.
Hadien kane, u Lat ka jylla ula pynbna mynta ka sngi ba la pynsangeh noh shwa ia ka elekshon sha ka GHADC haduh ban pynbna da kumwei pat.
Kane ka rai ka sorkar ban pynsangeh shwa ia ka elekshon ka long hadien ba kala mih ka jingiasngew pher jaitbynriew ha rilum Garo hadien ba u Estamur Mominin uba dei ruh u MLA barim ula shah shoh ha ki paidbah ha ka por ba u thmu ban leit thep kyrteng ha DC ophis ha Tura.
Ka jinglong jingman kala nang at phyllung hadien ba ka ophis ka GSU ha iew Chibinang, ka la shah pynjulor bad kumjuh ki dukan, ki kali kila shah wiang ding.
Ka bor district ka West Garo Hills kala pynjari korphiw bad khang internet ban tehlakam ia kane ka jingjia bad ka la pyniaid pynneh jingsuk ne flag March da ki shipai.
Pynsangeh noh shwa ka sorkar ia ka elekshon sha GHADC
