Shillong: U nongialam liangpyrshah u Dr. Mukul Sangma ula kam ba ka jingbteng ka jingtih dewiong beain ka dei ka buit ba leh khnang ki briew kiba don ha ka sorkar. Kumno ka sorkar kam iohi haba la shalan ia u dewiong man ka sngi. Kane ka dei ka buit sianti ki dang don ha ka bor, la kynnoh u Dr. Mukul.
Kane ka jingkren u Dr. Mukul ka long halor ka jingjia ha Thangsko, East Jaintia Hills dang shen.
Haba kren mynta ka sngi, u Dr. Mukul ula ong ba ka jingjia ka la khring ia ki paidbah ka ri baroh kawei ia ka nam ba bha ka jylla, hynrei kaba la kylla budnam sniew na kane ka jingjia.
Kaba biang tam ban pynkut ia ki kam beain ha ka jylla khamtam ka jingtih deiwong beain, ka long ba kane ka sorkar ka dei ban leit noh shi syndon lym kumta, ka jingtih beain ia u dewiong kan iai bteng katba ki dang don ha ka bor.
U la ong ba kane ka dei ka buit ki riew shalak ban ioh kamai spah beain katba ki dang don ha ka bor, kumba ki la leh ban shut hied ia ki MLA na kiwei ki party. U kynther ruh ba ki ai jingbit ruh ban buh ia ki karkhana coke haba la khang ia u dewiong, kaei kane, la buh jingkylli u Dr. Mukul.
Kaba bha tam ka long ba u Myntri Rangbah u dei ban hiar shuki halor ka jingkitkhlieh ym namar ba u duh ia ka jingbun paid bad ia ka jingtohkit halor kane, dei ban aiti ha ki tnad ka sorkar India namar ba ka jingtohkit hapoh ka jingpeit ka sorkar jylla kan wanrah ka jingartatien bad ka jingjngut ha ki paidbah ka jylla.
Katkum ka jingong u Dr. Mukul, kaba u shaniah ka long ha ka kashari halor kane ka jingjia ba kan ai ka rai kaba hok.
La leh ki riew shalak ha ka sorkar | Conrad u dei ban hiar shuki | ai tohki ki sorkar India, ym myntoi katba dang pyniaid ka sorkar jylla: Dr. Mukul
