Shillong:Ka jingkhring ka jaka jngohkai ban iaid kjat ha ki jingkieng siej ne bamboo trek sha u mawbah mawsan, u mawryngkhang ka la nang khlain shuh ia ki nongwankai.
Ka kynhun ki briew kaba pyniaid ia kane ka jaka jngohkai, ka Tourism Promoters Trekking Society (TPTS), Wahkhen ka la pynbha bad shna thymmai shuh shuh ia ki lynti iaid bad khamtam ia ka jingkieng doi doi ha wahsin shwa ban poi sha u Mawryngkhang.
Kane ka jaka jngohkai kaba jngai tang kumba 2km na surok, ban iaid kjat bad noh sha wahmru ne wahrew ka la khring ia ki nongwankai na kylleng ka pyrthei. Ha kane ka sngi Nyngkong ruh, shi kynhun ki nongwankai na ri Israel kila wan ban mad ia ka jingitynnad jong katei ka jaka.
Mynta sa kawei ka jingkieng doi doi la dep ban shna ha wahsin ha kaba ki briew kila sngew tynnad shi kat dei ei ban ioh mad ia ka jingitynnad ka mariang, ka lyer pynngad, bad ka mariang ba jyrngam sawdong.
Katkum ka jingiathuh ki nongpyniaid, ym duna spah ngut ki briew kila wan kai man ka sngi sha ka lynti iaid kjat ha jingkieng siej ban poi sha u Mawryngkhang.
Ym tang katta, ki la iarap ruh ban ai kam ai jam ia ki nongshong shnong kum ka jingbuh dukan, ka jingialam briew bad kiwei.
Mih sa ka jingkieng doi doi thymmai sha u Mawryngkhang
