Shillong: U myntri sorkar jylla uba dei ruh u MLA ka BJP bah Sanbor Shulla ula iakynduh ia u myntri ka tnad Road bad Transport ka sorkar India u Nitin Gadkari ha nongbah Delhi.
Kane ka jingleit kynduh u bah Sanbor ka long ban kyntu ia u myntri ban shim khia ban pynsted ban pyndep ia ka surok Four Lane na Umshyrpi shaduh Sadew, kaba la wanrah ka jingeh tasam ia ki paidbah ha ka leit ka wan.
Lah ban kdew ba u symbud myntri rangbah ba peit ia ka PWD ka jylla u bah Prestone Tynsong ula kam ban pyndep ia kane ka surok shwa ban kut u snem 2025 hynrei kam shym la urlong satia.
La synran lang ia u bah Sanbor da u President ka BJP Meghalaya u Rikman Momin bad kiwei ki nongialam ka party BJP.
U bah Sanbor ula iakren ia u myntri ban tei ia ka surok suin na Barik sha Jhalupara ban pynduna ia ka jingdheng kali ha ka nongbah.
U Nitin ula kular ban rah ia kane ka mat sha ka NHIDCL bad ula ai jingmut ruh ban thaw ia ka Infrastructure Development Committee khnang ban pyndep kham sted ia ka surok suin.
Kynduh u bah Sanbor ia u Nitin ba slem eh ka surok na Umshyrpi sha Sadew
